әрдоған: түркийә 2021 - йили експортта рекорт йаратти

түркийә авази радийоси хәвири: әрдоған истанбулда өткүзүлгән 2021- йиллиқ ташқи сода санлиқ мәлуматлирини елан қилиш йиғинида сөз қилип: «түркийә тунҗи қетим киризисләрниң астида изилип кәткән әмәс, киризисләрни тизгинләш арқилиқ пурсәткә айландурған дөләткә айланди.  2021- йилидики омумий експортимиз  алдинқи йилға селиштурғанда %32.9 ешип, 225 милйард 368 милйон долларға йәтти. бу бир рекорт... биз 2002- йили аран 87 милйард 600 милйон доллар болған ташқи сода експорт миқдаримизни 2021- йилиға кәлгәндә 496 милйард 700 милйон долларға йәткүздуқ... експорт қилинған 75 хил мәһсулат гурупписида җумһурийәт тарихидики әң йуқири експорт қиммитини йараттуқ» деди.

җумһур рәис әрдоған, ташқи сода қизил рәқиминиң бултурқиға селиштурғанда %7.8 төвәнләп, 45 милйард 900 милйон долларға чүшкәнликини, експортниң импортқа селиштурма нисбитиниң %83.1 кә өрлигәнликини ейтти.

америка қошма иштатлириға қилинған експортта әң көп ешиш көрүлгәнликини билдүргән җумһур рәис әрдоған: «җәнубий америкаға қилған експортимиз %86.6, йавропа иттипақи сиртидики йавропа дөләтлиригә қилған експортимиз %29, йеқин вә оттура шәрққә қилған експортимиз %22.6 ашти. шималий африқаға қилинған експортимиз %44.8 ашти. биз нөвәттә дунйа билән риқабәтлишиватимиз. йеқинқи 12 айниң 11 идә експорт рекорти йараттуқ. түркийә бу җәһәттә утуқ қазанди. бу санлиқ мәлуматлар билән түркийә дунйада гепи өтидиған дөләтләрниң биригә айланди» дегәнләрни қәйт қилди.

у, түрк лира билән сода қилидиған дөләтләр саниниң күндин- күнгә көпийиватқанлиқини тилға елип: «2021- йилидин башлап 205 дөләт вә районға қилған експорт содимизни миллий пулимиз билән қилдуқ. түрк лираси билән қилған експортимиз 183 милйард лираға йәтти. тавар содисидики күчлүк орнимизниң мулазимәт саһәси експортимизға иҗабий төһпә қошқанлиқини көрүватимиз» деди.

җумһур рәис әрдоған: « 2022 – йиллиқ (екиспорт) нишанимизни 250 милйард долларға өзгәртимиз» дегәнләрни сөзлиригә илавә қилди.