115 döletke güle éksport qilindi
dunya güle (örük qéqi) ishlepchiqirishida muhim orunni igileydighan malatya ötken yili (2021) 115 döletke 90 ming 203 tonna güle éksport qilip, 347 milyon 905 ming dollar tashqi péréwot yaratti.
türkiye awazi radiyosi xewiri: malatya soda aksiye bazirining bashliqi ramazan özjan: «dékabir (2021) éyida 8 ming 924 tonna güle éksport qilduq. buningdin 42 milyon 741 ming dollar kirim qilduq. buni 2020-yili dékabir éyigha sélishturulghanda, hem éksport hemde kirimda muhim éshishlarning bolghaliqini körüwalghili bolidu» dédi.
u ötken yili (2021) éksportta muhim éshishlarni qolgha keltürgenliklirini eskertip, sözini mundaq dawamlashturdi:
«2021-yili 90 ming 203 tonna güle éksport qilduq we 347 milyon 905 ming dollar kirim qilduq. buning bilen, yéqinqi besh yilning rékortini yarattuq.»
u yiraq sherq bazarlirigha qiliniwatqan éksportnimu ashurghanliqlirini bildürüp: «xitaygha yéqinqi besh ayda 2 ming 542 tonna güle éksport qilduq we buningdin 6 milyon 867 ming dollar kirim qilduq» dédi.
u her yili 110 din 115 kiche bolghan döletke güle éksport qiliwatqanliqlirini eskertip, ötken yili awghust éyidin dékabir éyighiche amérikagha 5 ming 940 tonna güle éksport qilinghanliqini, amérikaning güle éksport qilinghan döletlerning ichide birinchi orunda turidighanliqini؛ firansiyege 3 ming 871 tonna güle éksport qilinghanliqini we bu sanning ikkinchi orunda turidighanliqini, gérmaniyege 3 ming 210 tonna güle éksport qilinghanliqini we buning üchinchi orunda turidighanliqini qeyt qildi.
u yéqinqi besh yilda 467 ming 862 tonna güle éksport qilinip, dölet iqtisadigha 1 milyard 384 milyon dollar kirim qilinghanliqini eskertip, malatya gülesining dölet iqtisadi üchün muhim oruda turidighanliqini bildürdi.
