türkiye – engliye otturisida erkin soda kélishimi imzalandi

türkiye awazi radiyosi xewiri: erkin soda kélishimi imza murasimigha widéo konférans wasitisi arqiliq ishtirak qilghan türkiye soda ishliri ministiri ruhsar pekjan, erkin soda kélishimining, aldimizdiki mezgilde türkiye bilen engliye otturisidki soda sahesi tereqqiyatining eng chong kapaliti bolidighanliqini tekitlep mundaq dédi: «bügün türkiye bilen engliye munasiwetliri jehettin nahayiti muhim we tarixiy bir künni bashtin kechürüwatimiz. bu kélishim sayisida, engliye bilen türkiye otturisidiki soda qurulmisigha dair héchqandaq bir éniqsizliq qalmaydu. shuninggha ishinimenki, soda ishlirimiz buningdin kéyin téximu tereqqiy qilidu. erkin soda kélishimi tamozhna ittipaqining 25 yilda qolgha keltürgen muweppeqiyetlirini saqlap qélish bilen bir waqitta, munasiwetlirimizni yenimu chongqurlashturush yolida tunji qedemni tashlawatimiz.»

ministir pekjan, terepler bolush süpiti bilen «biterep erkin soda kélishimi» ni nishan qiliwatqanliqlirini we buning réalliqqa aylanghanliqini eskertish bilen bir waqitta, kélishimning pütkül sanaet we yéza igilik mehsulatlirini öz ichige alidighanliqini, kélishimning 1 – yanwardin étibaren künge ige bolidighanliqini, hemde waqit jehettin héchqandaq ziyan körülmeydighanliqini tekitlep mundaq dédi: «kélishim bolmisa idi, engliye bilen bolghan éksportning texminen % 75 ti baj yükige duch kéletti, shuning bilen, texminen 2.4 milyard dollarliq ziyan tartqan bolattuq. bu xiris shu tapta depiy qilindi. erkin soda kélishimi, türkiye – engliye munasiwetliri jehettin yéngi we adettin tashqiri derijide alahide burulush nuqtisi hésablinidu. shuning bilen bir waqitta, bu kélishim, mewjut soda – iqtisadiy munasiwetlirimizning dairisining qoghdilishi we tereqqiy qildurulushi nuqtisida hökümetlirimiz otturisidiki ortaq ang we iradining netijisidur.»