рухсар пәкҗан: түркийә билән америка бирликтә барлиқ тосалғуларни йеңәләйду

сода министири рухсар пәкҗан америка вә түркийә бирликтә хизмәт қилип, барлиқ тосалғуларни йеңәлайдиғанлиқини ейтти.

рухсар пәкҗан: түркийә билән америка бирликтә барлиқ тосалғуларни йеңәләйду

түркийә авази радийоси хәвири: рухсар пәкҗан америка сода министири вилбур росму иштирак қилған түркийә сода - санаәтчиләр вә пайчик базири бирликиниң әнқәрәдики хизмәт зийапитидә нутуқ сөзлиди.

министир рухсар пәкҗан вилбур рос билән бирликтә түркийәниң санаәт иқидари, қабилийәтлири вә көрсәткүчи һәққидә саһәниң вәкиллири билән үнүмлүк йиғинларни өткүзгәнликини билдүрди.

рухсар пәкҗан түп мәқситиниң җумһур рәис рәҗәп таййип әрдоған билән америка пирезиденти доналд трамп оттуриға қойған 100 милйард долларлиқ сода омумий соммисини ишқа ашуруш икәнликини билдүрүп, буниң үчүн април ейидики вашингитон зийаритидин етибарән вилбур рос билән бирликтә хизмәт қиливатқанлиқини вә бу даиридә хизмәт гурупписи қуруп чиққанлиқини әскәртти. 

һәр икки тәрәпниң өзара чүшүнүш һасил қилғанлиқини вә күткәнлириниң немә икәнликини йахши билишидиғанлиқини тәкитлигән рухсар пәкҗан, оттуриға қойулған нишанға йетиш үчүн сода санаәт саһәси асасий қурулушлириниң ишқа ашурулиши керәкликини ейтти.

рухсар пәкҗан асасий қурулуш хизмәтлири билән биргә бәзи саһәләрдә содиниң алдидики тосалғуларниң елип ташлиниши керәкликини тәкитләп, «һәр икки дөләт бирликтә хизмәт қилип барлиқ тосалғуларни йеңәләйду. һөрмәтлик рос әпәндиниң 5 күнлүк бу зийарити интайин муһим вә өз өз нөвитидә йәнә, америка һөкүмитиниң бу ишқа нә қәдәр җиддий қариғанлиқиниң ипадисидур. һөрмәтлик рос әпәнди билән зийарити бойичә барлиқ саһәләрни бирликтә анализ қилдуқ» деди.

америка сода министири вилбур росму «биз бу йәргә һәр икки дөләтниң сода мәнпәтлирини күчәйтиш үчүн кәлдуқ. түркийә америкиға бивастә мәбләғ салған дөләтләр қатарида 15орунда туриду. түркийә ширкәтлириниң америкидики сетишлири 700 милйон доллар болуштәк йуқири сәвийәгә йәтти. буларниң давамлишишини үмид қилимиз» деди.



مۇناسىۋەتلىك خەۋەرلەر