gérmaniye: türkiye bilen bolghan hemkarliq pursetlirimiz adettin tashqiri derijide yaxshi

gérmaniye iqtisadiy we énérgiye ishliri muawin ministiri tomas baréis türkiye bilen gérmaniye otturisidiki énérgiye, qatnash we sayahet sahesidiki hemkarliq pursetlirining adettin tashqiri derijide yaxshi ikenlikini éytti.

gérmaniye: türkiye bilen bolghan hemkarliq pursetlirimiz adettin tashqiri derijide yaxshi

türkiye awazi radiyosi xewiri: gérmaniye iqtisadiy we énérgiye ishliri muawin ministiri tomas baréisning türkiye ziyariti toghruluq élan qilinghan yazma bayanatta, bariésning paytext enqerede türkiye dairiliri bilen türlük uchrishishlarni élip barghanliqi, ziyaretning asasliq küntertip maddisini, türkiyediki gérman shirketliri üchün meblegh sélish pursetliri, bolupmu tömür yoli saheside ul eslihe qurulushlirining dairisini kéngeytish mesiliside hemkarliq imkaniyetlirining teshkil qilghanliqi qeyt qilindi.

tomas baréisning, «türkiye – gérmaniye énérgiye munbiri» da gérmaniye namidin paaliyetlerni élp barghanliqi eskertilgen bayanatta, ziyaret jeryanidiki uchrishishlarda, énérgiye sahesidiki hemkarliqni yenimu kücheytish we sijil énérgiye layiheliri heqqide söhbet ötküzülgenliki qeyt qilindi.

bayanatta, baréisning gérmaniye iqtisadiy we énérgiye ishliri ministiri pétér altmaérning, türkiye énérgiye we tebiiy bayliqlar ministiri fatih dönmezni 2019 – yili 23 – öktebir küni gérmaniyening paytexti bérlinda chaqirilidighan, «3 – nöwetlik türkiye – gérmaniye énérgiye munbiri» yighinigha teklip qilghanliqi tekitlendi.

gérmaniye hökümitining sayahet ishliri mesuli süpitidimu wezipe ötewatqan baréisning enqerede, ikki dölet otturisidiki sayahet mesilisi toghriliqmu muzakirilerni élip barghanliqi bildürülgen bayanatta, kelgüsi sayahet mewsumida ikki dölet munasiwetlirini téximu tereqqiy qildurush toghruluq özara pikir almashturulghanliqi qeyt qilindi.

bayanatta, ziyariti jeryanidiki uchrishishlirining, türkiye dairilirining gérmaniye we gérman shirketliri bilen hemkarliq ornitishqa qanchilik derijide ehmiyet bérip kéliwatqanliqining eng roshen namayendisi ikenlikini eskertken baréisning, «türkiye bilen gérmaniye otturisidiki énérgiye, qatnash we sayahet sahesidiki hemkarliq pursetliri adettin tashqiri derijide yaxshi, shu wejidin, türkiye bilen uchur – alaqini téximu qoyuqlashturushni xalaymiz» dégen sözliri neqil keltürüldi.



مۇناسىۋەتلىك خەۋەرلەر