yawropa ittipaqi rusiyege yürgüzülüwatqan émbargolarning mudditini uzartti

türkiye awazi radiyosi xewiri: yawropa ittipaqi kéngishining bashliqi donald task, tünügün yawropa ittipaqining bélgiyening paytexti biryussélda chaqirilghan bashliqlar yighinidin kéyin ammiwi ortaqlishish tor béti Twitter sehipiside élan qilghan bayanatida, yighinda, yawropa ittipaqining rusiyege yürgüzüwatqan iqtisadiy émbargolarning mudditini 8 – qétim uzartish toghruluq qarar chiqarghanliqini tekitlep mundaq dédi: «yawropa ittipaqi <minisk kélishimi> ni ijra qilish mesiliside héch algha ilgirilimigen rusiyege qarshi yürgüzülüwatqan émbargolarning mudditini uzartish qararnamisini birdek awaz bilen maqullidi.»

rusiye 2014 – yili 18 – mart küni qirim aptonom jumhuriyiti bilen siwastopolni qanunsiz halda bésiwalghanidi.

qirimning rusiye teripidin ishghal qilinishi we ukrainaning sherqiy qismida yüz bergen weqelerdin kéyin, yawropa ittipaqi, amérika qoshma ishtatliri we bashqa döletler rusiyege iqtisadiy émbargolarni yürgüzüshke bashlighanidi.

yawropa ittipaqi 2014 – yili tunji qétim rusiyege iqtisadiy émbargolarni yürgüzüshni qararlashturghanidi.

melumatlargha qarighanda, mudditi uzartilghan iqtisadiy émbargolar sewebidin, yawropa ittipaqigha eza 28 dölet rusiyege qoral - yaragh satalmaydiken. rusiye yawropa ittipaqi elliridin néfit we tebiiy gaz saheliride ishlitilidighan bezi téxnologiyelerni sétiwalalmaydiken. rusiyening resmiy bankiliri yawropadiki pul – muamile saheside chetke qéqilidiken.

soda we sélimilargha qaritilghan cheklimilerni öz ichige alghan émbargolarning mudditi her 6 ayda bir qétim uzartilip kéliwatqan bolup, mewjut émbargolarniing mudditi 2019 – yili 31 – yanwar küni toshatti.

igilinishiche, yawropa ittipaqining mal – mülüklerni tonglitip qoyush we sayahet cheklimisidin teshkil tapidighan qoshumche émbargolirimu köp sandiki ruslar we  yuqiri derijilik ayrimchi rehberlerge qaritilghan iken.