путин: түрк еқими туруба линийәси венгирийәгичә созулуши мумкин

русийә пирезиденти виладимир путин қурулуши давамлишиватқан түрк еқими тәбиий газ туруба линийәсиниң венгирийәгичә созулуш еһтималлиқиниң барлиқини ейтти.

1052758
путин: түрк еқими туруба линийәси венгирийәгичә созулуши мумкин

түркийә авази радийоси хәвири: путин венгирийә баш министири виктор орбан билән москвада елип барған учришишидин кейин өткүзүлгән ахбарат елан қилиш йиғинида мундақ деди: «русийәниң тәбиий гази венгирийә терротерийәсидин һалқип, йавропаға йетип бармақта. венгирийә терротерийәсидики йәр асти искилатлири тәләпләр әң йуқири сәвийәгә йәткән мәзгилләрдиму йавропалиқ истемалчиларни бихәтәр һәм үзлүксиз тәбиий газ билән тәминләштә муһим рол ойнимақта.  венгир шериклиримиз русийәниң тәбиий газини йавропаға йәткүзидиған йеңи мәнзилләрни дахил қилиш имканийәтлири үстидә издәнмәктә. түрк еқими туруба линийәси тамамланғандин кейин, бу линийәниң тармақлиридин бириниң венгирийә терротерийәсидин өтүш еһтималлиқи йуқири, дәп қараймән.»

енергийәниң икки дөләт оттурисидики һәмкарлиқниң муһим бир һалқиси икәнликини әскәрткән путин, русийәниң венгирийә истемал қиливатқан нефитниң % 75 тидин көпрәкини, тәбиий газниңму % 60 тидин көпрәкини тәминләватқанлиқини тәкитлиди.

венгирийә баш министири орбан, 2019 – йили тошидиған мәвҗут келишимниң муддитини 2020 – йилғичә узартиш мәсилисидә русийә пирезиденти виладимир путин билән ортақ тонуш һасил қилғанлиқлирини тәкитләп мундақ деди: «пирезидент путин ейтқандәк, венгирийәниң җәнубий районидин венгирийәгә қарап давамлишиватқан тәбиий газ туруба линийәсиниң бизниң земинимиздин өтүшини тәләп қилғанлиқимиз сир әмәс. бу венгирийәгә адәттин ташқири дәриҗидә пурсәт йаритип бериду. пирезидент путин алийлиридин бу һәқтә ойлинишини тәләп қилдим.»

мәлуматларға қариғанда, түрк еқими туруба линийәсидә тәбиий газ еқишиниң 2019 – йили декабир башлиниши пиланланмақта икән.

туруба линийәсиниң деңиздики қисми русийәниң анапа шәһиридин түркийәниң қийикөй райониғичә қарадеңизни бойлап тәхминән 930 километирлиқ мусапини бесип өтидикән.

лайиһәниң деңиз қисминиң қурулуши русийәниң газпром ширкитиниң % 100 иштирак қилиши билән South Stream Transport B.V.  ширкити тәрипидин ишқа ашурулмақта икән.



مۇناسىۋەتلىك خەۋەرلەر