ئىتالىيە شىركىتى قاتارغا ھەربىي تىك ئۇچار ئايروپىلان سېتىپ بېرىدۇ

تۈركىيە ئاۋازى رادىيوسى خەۋىرى: شىركەت تەرىپىدىن بۇ ھەقتە ئېلان قىلىنغان باياناتتا ئەسكەرتىلىشىچە، قاتارنىڭ پايتەختى دوھادا ئىشقا ئاشۇرۇلغان خەلقئارا دېڭىز مۇداپىئەسى يەرمەنكىسى ۋە كونفېرانسىدا قاتار دائىرىلىرى بىلەن كېلىشىم ئىمزالانغان بولۇپ، كېلىشىمگە ئاساسەن، قاتار لېئوناردو شىركىتىدىن 3 مىليارد دوللار قىممىتىدە قۇرۇقلۇق ھەربىي ھەرىكەتلىرى ئۈچۈن 16 دانە « NH90 TTH » تىپلىق ۋە دېڭىز ھەربىي ھەرىكەتلىرى ئۈچۈن 12 دانە « NH90 NFH» تىپلىق ھەربىي تىك ئۇچار ئايروپىلان سېتىۋالىدىكەن.

ئىگىلىنىشىچە، يېڭى ئەۋلاد ئومۇمىي نىشان تىك ئۇچار ئايروپىلان « NH-90 » لايىھەسى گېرمانىيە، فىرانسىيە، ئىتالىيە ۋە گوللاندىيەنىڭ شېرىكچىلىكىدە ئىشقا كىرىشتۈرۈلگەن بولۇپ، تۇنجى پىروتوتىپ تىك ئۇچار ئايروپىلان 1995 – يىلى 18 – دېكابىر كۈنى ئۇچۇشقا باشلىغان. « NH-90 »  تىپلىق تىك ئۇچار ئايروپىلانلار يېنىك قېتىشما ئىشلىتىلىپ ئىشلەپچىقىرىلغان.