fidan: türkiye-süriye munasiwetliri yéngi basquchqa kirdi

türkiye tashqi ishlar ministiri xaqan fidan: «yéngi süriyede p k k / y p g we daish qatarliq térrorluq teshkilatlargha orun yoq» dédi.

2231204
fidan: türkiye-süriye munasiwetliri yéngi basquchqa kirdi

türkiye jumhuriyiti tashqi ishlar ministiri xaqan fidan, dölet mudapie ministiri yashar güler, milliy istixbarat idarisi bashliqi ibrahim qalin, süriyediki yéngi hökümetning tashqi ishlar ministiri esed hesen sheybani, mudapie ministiri murhef ebu qesra we istixbarat idarisi bashliqi enes xettab bilen paytext enqerede élip barghan 3+3 formatidiki yighindin kéyin sheybani bilen qoshma muxbirlarni kütüwélish yighini ötküzdi.

8-dékabirda beshshar esed tüzümining aghdurulushidin kéyin süriyede yéngi bir sehipining échilghanliqini bildürgen fidan, süriyediki yéngi hökümet we xelqara jemiyetning bu pursettin toghra paydilinishi kéreklikini tekitlidi.

ministir xaqan fidan bu jehette süriyeliklerning bashlamchiliqi we igidarchiliqida hemmini baghrigha basidighan bir siyasiy jeryanning berpa qilinishining nahayiti muhimliqini tekitlep: «süriyediki barliq diniy, étnik we mezhep guruppilirining quchaqlishish waqti keldi. yéngi hökümetning sighdurushchan chüshenche bilen heriket qilishi kishini memnun qilidu. türkiye bolush süpitimiz bilen, milliy diyalog qurultiyining süriyediki barliq terkibiy qisimlarning iradisini eks ettürüshige qaritilghan tirishchanliqlirini qollaymiz» dédi.

bu tarixiy burulush nuqtisida xelqara jemiyetning wezipisining süriyege her türlük yardemlerni qilish ikenlikini eskertken ministir fidan: «süriye xelqining özige tayinip turushigha yardem qilishimiz kérek. süriyeni riqabet meydani emes, hemkarliq meydani dep qarishimiz kérek» dégenlerni qeyt qildi.

u aridin 12 yil ötkendin kéyin ötken ayda türkiyening demeshiq elchixanisining échilghanliqini eslitip: «heleb konsulxanimiz 20-yanwar küni xizmet bashlaydu. türk hawa yolliri qatnishimu yéqinda bashlinidu» dédi.

esed dewri süriyesining yillar boyi térrorluq teshkilatlirigha makan bolghanliqini we térrorluq éksport qilghanliqini qeyt qilghan fidan: «yéngi süriyede p k k / y p g we daish qatarliq térorchi teshkilatlargha orun yoq» dédi.

ministir fidan özining süriyediki yéngi hökümetning térrorluqqa qarshi küresh qilish iradisidin memnun ikenlikini bildürüp, bu jehette emeliy qedem bésishqa ötüsh kéreklikini otturigha qoydi.

türkiye we xelqige «süriyede inqilab» bashlanghandin tartip döliti bilen bille bolghan türkiye we uning xelqige rehmet éytqan esed hesen sheybani bolsa: «süriye bilen türkiye yéngi bir tarix yazdi» dédi.

u buning qérindashliq asasigha qurulghan bir tarix ikenlikini qeyt qilip, bu qérindashliqning rayonda muqimliq we bixeterlikni ishqa ashurush üchün qurulghanliqini tekitlidi.

türkiye bilen süriye munasiwetlirining nahayiti yéqin kelgüside «yéngi upuqlargha qarap» her xil sahelerde téz tereqqiy qilidighanliqini éytqan sheybani: «yéngi hökümet süriye zéminining türkiye we türk xelqige qarshi tehdit bolushtin chiqirilishi kéreklikige ishinidu» dégenlerni sözlirige ilawe qildi.


خەتكۈچ: #uyghurche , #süriye , #türkiye

مۇناسىۋەتلىك خەۋەرلەر