«pütkül xelq inaq yashaydighan bir süriye döliti qurulushini arzu qilimiz»

tashqi ishlar ministiri xaqan fidan paytext enqerede bashlanghan  bash elchiler yighinida qilghan sözide, buningdin kéyinki basquchta oxshimighan étnik we diniy guruppilarning hemmisige wekillik qilidighan hakimiyet éngi we pütkül xelq tinchliq ichide inaq yashiyalaydighan bir süriye dölitining berpa qilinishini arzu qilidighanliqlirini éytti.

türkiye tashqi ishlar ministirliqi her yili ötküzidighan bash elchiler yighinining 15-qétimliqi paytext enqerede bashlandi.

yighin «türkiyening diplomatik paaliyetliri we dunyawi tesirliri» témisida paytext enqerede ötküzülmekte.

tashqi ishlar ministiri xaqan fidan échilish nutqi sözligen yighingha, türkiyening 146 elchixanisi we 13 daimiy wakaletxanisida wezipe ötewatqan bash elchiler bilen birge, tashqi ishlar ministirliqining merkiziy ish béjirish ornida wezipe ötewatqan köp sanda bash elchiler we yuqiri derijilik mesullar qatnashmaqta.

13-dékabirghiche dawamlishidighan yighin dairiside rayonluq we xelqaraliq özgirishler muhakime qilinidighan yighin bölümliride, türkiyening tashqi siyasitige munasiwetlik rayonluq we dunyawi mesililer heqqide keng kölemlik kéngesh élip bérilmaqta.

tashqi ishlar ministiri xaqan fidan yighinda échilish nutiqi sözlidi.

fidan sözide, tünügün (2024-yili 8-dékabir) süriyede otturigha chiqqan özgirishlerning ümid chirighi yandurghanliqini tekitlep mundaq dédi:

«birleshken döletler teshkilati bashchiliqidiki xelqaraliq organlardin süriye xelqige yardem qolini sunup, hemmige wekillik qilidighan hakimiyet tüzülmisi shekillendürülüshini qollishini kütüwatimiz.

süriyede uzun muddetlik hel qilish charisi bilen tinchliq we muqimliqning peqet dölet ichi kélishimi arqiliqla emelge ashidighanliqini desleptin tartipla otturigha qoyup kéliwatimiz. emma shunche köp tirishchanliq körsetken we süriye hakimiyitige purset bergen bolushimizgha qarimay, süriye hakimiyiti öz xelqi bilen yarishish yoligha mangmidi.

 bolupmu süriye hakimiyitining jumhur reisimiz rejep tayyip erdoghanning yéqinlishiwatqan basquchni közde tutup qilghan chaqiriqlirigha ijabiy inkas qayturmasliqi, bizning neqeder toghra dégenlikimizni ispatlaydighan özgirishlerning otturigha chiqishigha seweb boldi.

nöwette süriyede yéngi bir dewr bashlandi. shunga, emdi yiraqqa nezer tashlash kérek. buningdin kéyinki basquchta buningdin kéyinki basquchta oxshimighan étnik we diniy guruppilarning hemmisige wekillik qilidighan hakimiyet éngi we pütkül xelq tinchliq ichide inaq yashiyalaydighan süriye dölitining berpa qilinishini arzu qilimiz. qoshniliri bilen yaxshi munasiwetlerge ige bolidighan, rayonigha tinchliq we muqimliq élip kélidighan yéngi süriyeni körüshni xalaymiz. buning üchün kéreklik yardemlerni bérishke teyyarmiz.»

süriyede 27-noyabir küni beshshar esed küchliri bilen öktichi qoralliq guruppilar otturisidiki toqunushlar keskinleshkenidi.

7-dékabir (2024) küni paytext demeshiqqe kirishke bashlighan guruppilarni xelq ammisimu qollap, qizghin qarshi alghan, buning netijiside beshshar esed hakimiyiti bu yerde we bashqa nurghun rayonlarda kontrolluqni pütünley yoqitip yimirilgenidi.

tünügün baas partiyesining dölettiki 61 yilliq hakimiyiti axirlashqan bolup, bu hakimiyetning rehbiri beshshar esed paytext demeshiqtin qéchip ketkenidi.