گىرۇزىيەدىكى نامايىشلار داۋام قىلماقتا

گىرۇزىيەنىڭ پايتەختى تىفىلىستا باش مىنىستىر ئىراكلى كوباخىدزېنىڭ دۆلەتنىڭ ياۋروپا ئىتتىپاقىغا كىرىش سۆھبىتىنى 2028-يىلغىچە توختىتىپ قويۇش قارارىغا قارشى داۋاملىشىۋاتقان نامايىشلاردا ساقچى بىلەن نامايىشچىلار ئارىسىدا توقۇنۇشلار يۈز بەرمەكتە.

نامايىشچىلار پارلامېنت بىناسى ئالدىدا توپلىنىپ نارازىلىقىنى داۋاملاشتۇرماقتا، ساقچىلار نامايىشچىلارغا يۇقىرى بېسىملىق سۇ ۋە گاز ئىشلىتىپ مۇداخىلە قىلماقتا.

پىرېزىدېنت سالومې زۇرابىشۋىلى، تىنچ ئۇسۇلدا ئۆتكۈزۈلگەن نامايىشلارغا قىلىنغان مۇداخىلىنى كىشىلىك ھوقۇق دەپسەندىچىلىكى دەپ ئاتىدى. ئامېرىكا قوشما ئىشتاتلىرى بىلەن ياۋروپا ئىتتىپاقى گىرۇزىيە ھۆكۈمىتىنىڭ قارارىنى ئەيىبلەپ، ئۆكتىچىلەر ۋە نامايىشچىلارنى قوللايدىغانلىقىنى جاكارلىدى.

بۇ ۋەقەلەر گىرۇزىيەدە ھۆكۈمەتكە قارشى كەيپىياتنى يۇقىرى كۆتۈرۈپ، خەلقئارالىق بېسىملارنى كۈچەيتىۋەتتى.