ئەردوغان: غەززەدە دەرھال ئۇزۇن مۇددەتلىك ئۇرۇش توختىتىلىشى كېرەك

جۇمھۇر رەئىس ئەردوغان ئىستانبۇلدىكى قۇرۇلتاي مەركىزىدە ئۆتكۈزۈلگەن  «‹TRT World› مۇنبىرى» يىغىنىدا سۆز قىلدى.

ئەردوغان مۇنداق دېدى:

«ئىسرائىلىيە بىلەن لىۋان ئوتتۇرىسىدا ئالدىنقى كۈنى تۈزۈلگەن ئۇرۇش توختىتىش كېلىشىمىنىڭ ئۇزۇن مۇددەتلىك بولۇشىنى ئۈمىد قىلىمىز. غەززەدىكى ئىرقىي قىرغىنچىلىقنى توختىتىش ۋە ئۇزۇن مۇددەتلىك تىنچلىققا ئېلىپ بارىدىغان يولنى ئېچىش ئۈچۈن ئىمكانىيەتنىڭ بارىچە تىرىشچانلىق كۆرسىتىشكە تەييارمىز. ئىنسانىيەت تېخىمۇ كۆپ چۈشكۈنلۈككە يۈزلىنىشتىن بۇرۇن، غەززەدە دەرھال ئۇزۇن مۇددەتلىك ئۇرۇش توختىتىشى كېرەك. تۈركىيە باشتىن تارتىپلا بۇ مەيدانىدا چىڭ تۇرۇپ كەلدى.»

جۇمھۇر رەئىس ئەردوغان سۆزىدە، بىرلەشكەن دۆلەتلەر تەشكىلاتىنىڭ چوقۇم ئىسلاھ قىلىنىشى كېرەكلىكىنى تەكىتلەپ مۇنداق دېدى:

«بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ قۇرۇلمىسىنى تېزدىن ئۆزگىرتىش كېرەك. 5 دائىمىي ئەزا، 15 ۋاقىتلىق ئەزا دېگەن قانداق گەپ؟... بۇنداق بولسا قەتئىي بولمايدۇ. بۇ شەكىلدە بۇ دۇنيانى باشقۇرغىلى بولمايدۇ. ھازىر بۇ بىرلەشكەن دۆلەتلەر تەشكىلاتى بىلەن دۇنيا تەرتىپىنى داۋاملاشتۇرالامدۇق؟ ياق. شۇڭا بۇ بىرلەشكەن دۆلەتلەر تەشكىلاتى پۈتۈنلەي ئىسلاھ قىلىنىشى كېرەك.

شۇنى ئالاھىدە تەكىتلەپ ئۆتىمەنكى، دۆلەتلىك ئاخبارات ئورگىنىمىز بولغان تۈركىيە رادىيو-تېلېزىيە ئىدارىسى- ت ر ت (TRT) پۈتكۈل جەمئىيەتلەرگە خىتاب قىلىدىغان ئىنسان ۋە قىممەت قاراشنى نىشان قىلغان تارقىتىشلىرى - ئاڭلىتىشلىرى بىلەن تۈركىيەنىڭ پەخىرلىك ئورگانلىرىدىن بىرىدۇر.  ‹TRT World› مۇنبىرى بولسا دۇنيانىڭ پىكىر-مۇھىتىغا خىلمۇخىللىق ئېلىپ كېلىۋاتقان بىر مۇنبەردۇر.

‹TRT World› مۇنبىرىنى پەقەت بىر مۇنازىرە مەيدانىلا ئەمەس، پۈتكۈل دۇنيانىڭ ساقلىنىۋاتقان مەسىلىلىرىگە ھەل قىلىش چارىسى ئىزدەش نىشانلىرى ئەمەلىيلىشىدىغان يول كۆرسىتىش مەيدانى دەپ قارايمىز.»