erdoghan tramp dewrining ottura sherq siyasiy weziyitige tesir körsitidighanliqini bildürdi

türkiye awazi radiyosi xewiri: jumhur reis erdoghan qirghizistan we wéngiriye ziyaretliridin kéyin türkiyege qaytiwétip, ayropilandiki muxbirlarning soallirigha jawab berdi.

u donald tramp bilen 5-noyabirdiki saylam netijiliri élan qilinghandin kéyin semimiy téléfon söhbiti ötküzgenlikini tilgha élip: «biz saylam jeryani we türkiye-amérika hemkarliqi heqqide sözleshtuq. u buningdin kéyinki jeryan toghrisida türkiye heqqide yaxshi sözlerni qildi. biz uni dölitimizge teklip qilduq. uning teklipimizni qobul qilishini ümid qilimen» dédi.

jumhur reis erdoghan: «biz pelestin mesilisi we rusiye-ukraina kirizisi qatarliq nurghun sinaqlargha duch kelduq. türkiye-amérika hemkarliqi arqiliq bularni hel qilish mumkin. pelestin we liwandiki israiliye tajawuzchiliqini toxtitish üchün, tramp ependining israiliyege qoral yardimini toxtitishi yaxshi bashlinish bolalaydu. trampning israiliye teripidin bashlanghan bu toqunushlarni axirlashturush wediliri bar. biz shu wedining emelge éshishini we israiliyege ‹toxta› déyilishini ümid qilimiz. tramp dewride mesilige hel qilish pozitsiyede turup muamile qilidighan bir amérika hökümitini körsek, biz bu (rusiye-ukraina) urushini asanla axirlashturalaymiz» dédi.

türkiye-yawropa ittipaqi munasiwetliri toghrisidimu toxtalghan  erdoghan, türkiyening yawropa ittipaqi bilen siyasiy tosalghulargha uchrimastin barawer sharait astida munasiwet ornitish terepdari ikenlikini bildürüp: «biz yawropa ittipaqidin (ezaliq namzatliqi jeryanida) zaye qilinghan waqitning ornini tolduridighan yiraqni körer bir pozitsiye kütmektimiz» dégenlerni sözlirige ilawe qildi.