ئەردوغان دونالد ترامپنىڭ سايلامدىكى غەلىبىسىنى تەبرىكلىدى
جۇمھۇر رەئىس رەجەپ تاييىپ ئەردوغان ئامېرىكانىڭ پىرېزىدېنتلىق سايلىمىدا غەلىبە قىلغان دونالد ترامپنى تەبرىكلىدى.
تۈركىيە ئاۋازى رادىيوسى خەۋىرى: جۇمھۇر رەئىس ئەردوغان ئىجتىمائىي تاراتقۇ ئادرېسىدا ئۇچۇر ھەمبەھىرلەپ، دونالد ترامپنىڭ غەلىبىسىنى تەبرىكلىدى.
ئەردوغان ئۇچۇرىدا: «ئامېرىكا قوشما ئشتاتلىرىدا ئۆتكۈزۈلگەن پىرېزىدېنتلىق سايلىمىدا چوڭ رىقابەتتىن كېيىن غەلىبە قىلىپ قايتا ئامېرىكا پىرېزىدېنتى بولۇپ سايلانغان دوستۇم دونالد ترامپنى تەبرىكلەيمەن. ئامېرىكا خەلقىنىڭ تاللىشى بىلەن باشلانغان بۇ يېڭى مەزگىلدە، تۈركىيە-ئامېرىكا مۇناسىۋەتلىرىنىڭ كۈچىيىشىنى، پەلەستىن مەسىلىسى، رۇسىيە-ئۇكرائىنا ئۇرۇشى قاتارلىق رايون ۋە خەلقئارالىق كىرىزىسلارنىڭ شۇنداقلا ئۇرۇشلارنىڭ ئاخىرلىشىشىنى ئۈمىد قىلىمەن. تېخىمۇ ئادىل بىر دۇنيا ئۈچۈن تېخىمۇ كۆپ تىرىشچانلىق كۆرسىتىلىدىغانلىقىغا ئىشىنىمەن. سايلامنىڭ دوست ۋە ئىتتىپاقداش ئامېرىكا خەلقى شۇنداقلا پۈتكۈل ئىنسانىيەت ئۈچۈن خەيرىلىك بولۇشىنى تىلەيمەن» دېدى.
