erdoghan istratégiyelik aliy hemkarliq kéngishi yighinida söz qildi
dölitimiz (türkiye jumhuriyiti) jumhur reisi rejep tayyip erdoghan qirghizistanning paytexti bishkekte chaqirilghan 6 – nöwetlik istratégiyelik aliy hemkarliq kéngishi yighinida söz qildi.
türkiye awazi radiyosi xewiri: erdoghan sözide, türkiye – qirghizistan dölet bixeterlik organliri otturisidiki hemkarliqning telim - terbiye paaliyetliri we téxnikiliq yardem layiheliri arqiliq muweppeqiyetlik dawamlishiwatqanliqini tekitlep mundaq dédi:
«fethullahchi térrorluq teshkilatini öz ichige alghan barliq térrorluq teshkilatlirigha qarshi kürishimizning üzlüksiz dawamlishidighanliqigha ishinimen. bügün biz imzalaydighan bixeterlik hemkarliq kélishimi arqiliq hemkarliqimizni téximu kücheytishni nishan qiliwatimiz.»
jumhur reis erdoghan israiliyening ghezzeni öz ichige alghan ishghaliyet astidiki pelestin zéminliridiki zulumining dunya xelqining wijdanini qattiq azablawatqanliqini eskertip mundaq dédi:
«israiliyening hazir liwangha qiliwatqan hujumliri pütkül rayonning bixeterliki we xelqara tüzümge tehdit salmaqta. biz ezerbeyjanning shusha shehiride ötküzülgen türk döletliri teshkilatining gheyriy resmiy yighinida ghezzede puqralarning omumyüzlük hujum nishani qilinishini qattiq eyibligen, ghezzede derhal urush toxtitish we ghezzege insaniy yardem bérish toghrisida chaqiriqta bolghaniduq. türk dunyasi bolush süpitimiz bilen pelestin mesilisini adil we uzun muddetlik hel qilish üchün tirishishimiz intayin muhim.
qirghizistanning israiliyege qaritilghan xelqaraliq bésimni kücheytish üchün birleshken döletler teshkilati qatarliq köp tereplik tirishchanliqlirimizni qollighanliqigha rehmet éytimen.»
shuning bilen bir waqitta, japparow pirézidéntliq sariyida ötküzülgen murasimda, qirghizistan bilen türkiye otturisidiki istratégiyelik hemkarliqni ilgiri sürüsh we ikki dölet xelqliri otturisidiki dostluq munasiwetlirini kücheytishtiki töhpiliri üchün, erdoghangha birinchi derijilik «manas ordéni» teqdim qildi.
erdoghanmu sadir japparowgha türkiyening özi yasighan «togg» tok aptomobilini sowgha qildi.
jumhur reis erdoghan türk döletliri teshkilati dölet bashliqliri kéngishining 11 – nöwetlik yighinigha qatnishish üchün yétip barghan qirghizistanning paytexti bishkekte bügün etigen resmiy murasim arqiliq qarshi élinghanidi.
