erdoghan: ghezzede bu esirning eng wehshiy irqiy qirghinchiliqi yüz bériwatidu

türkiye awazi radiyosi xewiri: türkiye jumhuriyiti jumhur reisi rejep tayyip erdoghan istanbulda ötküzülgen islam hemkarliq teshkilatining 40-nöwetlik iqtisadiy we soda hemkarliqi daimiy komitéti yighinining échilish murasimida söz qildi.

jumhur reis erdoghan israiliyening hujumigha uchrawatqan pelestinde 13 ayda 50 ming kishining shéhit  bolghanliqini, 2 milyon kishining dora-derman we ozuq-tülüksiz qaldurulup, ölümge mehkum qilinghanliqini, shundaqtimu pelestinliklerning ghururidin waz kechmigenlikini tekitlidi.

u sözini dawamlashturup: «yéqinqi bir esirning eng wehshiy irqiy qirghinchiliqliridin biri del yénimizdiki ghezzede yüz berdi we yüz bériwatidu. zionist hakimiyet we uning qollighuchiliri 13 aydin buyan her xil zulum we irqiy qirghinchiliqni qildi. emma pelestinlik qérindashlirimizni tiz püktürelmidi» dédi.

erdoghan ghezze we liwangha qaritilghan zionist tajawuzchiliqqa bérilidighan eng yaxshi jawablarning birining téximu köp döletning pelestin dölitini étirap qilishi ikenlikini tekitlep, islam dunyasining köz qarash perqlirini bir chetke qayrip qoyup, pelestin we liwan xelqining heqqaniy kürishini qollishining muhim ehmiyetke ige ikenlikini tekitlidi.

jumhur reis erdoghan yene israiliyening irqiy qirghinchiliqigha qarshi eng qetiy pozitsiye bildürgen döletlerning biri bolghan türkiyening barliq imkaniyetliri bilen pelestinlik qérindashlirigha yardem qilishqa tirishiwatqanliqini éytti.

erdoghan türkiyening 85 ming tonnidin artuq yardem bilen ghezzege eng köp yardem yetküzgen dölet ikenlikinimu bildürdi.