تۈركىيە رەھبەرلىرى TUSAŞ ھۇجۇمىغا قاتتىق نارازىلىق بىلدۈردى

تۈركىيە ئاۋازى رادىيوسى خەۋىرى:  تۈنۈگۈن تۈركىيە ئاۋىياتسىيە ۋە ئالەم بوشلۇقى سانائىتى شىركىتىنىڭ پايتەخت ئەنقەرەنىڭ قەھرىمانقازان ناھىيەسىگە جايلاشقان مۇئەسسەسەسىگە قىلىنغان تېررورلۇق ھۇجۇملىرىىدا 5 كىشى شېھىت بولدى.

ئىچكى ئىشلار مىنىستىرى ئەلى يەرلىكايا مەزكۇر تېررورلۇق ھۇجۇمىدا 5  كىشىنىڭ شېھىت بولغانلىقىنى، 22 كىشىنىڭ يارىلانغانلىقىنى بىلدۈردى.

يەرلىكايا تېررورلۇق ھۇجۇمىنى ئېلىپ بارغان بىرى ئايال ئىككى تېررورچىنىڭ يوقىتىلغانلىقىنى ۋە بۇ تېررورچىلارنىڭ كىملىكىنى ئېنىقلاش خىزمىتىنىڭ داۋاملىشىۋاتقانلىقىنى بىلدۈرۈپ: «تېررورچىلارنى نەپەستىن پۈتۈنلەي توختىتىش ئىرادىمىز قەتئىي» دېدى.

تۈركىيە بۈيۈك مىللەت مەجلىسى (پارلامېنتى) رەئىسى نۇمان قۇرتۇلمۇش خائىنلارچە ئېلىپ بېرىلغان تېررورلۇق ھۇجۇمىدا يارىلانغانلارنى دوختۇرخانىدا يوقلىدى.

قۇرتۇلمۇش بۇ يەردە قىلغان سۆزىدە مۇنداق دېدى:

«تۈركىيەنىڭ ئالغا ئىلگىرىلىشىگە توسالغۇ بولۇش ئۈچۈن سۇيىقەستلىك ئويۇنلارنى پىلانلاۋاتقانلارنىڭ كىملىكىنى ئوبدان بىلىمىز.»

مۇئاۋىن  جۇمھۇر رەئىس جەۋدەت يىلماز تېررورلۇق ھۇجۇمىنىڭ مۇداپىئە سانائىتىدىكى مۇۋەپپەقىيەتلەرنى نىشان قىلغانلىقىنى بىلدۈرۈپ: «تېررورچىلار ۋە ئۇلارنىڭ قوللىغۇچىلىرى ھەرگىزمۇ مەقسىتىگە يېتەلمەيدۇ» دېدى.

دۆلەت مۇداپىئە مىنىستىرى ياشار گۈلەر بۇ قەبىھ تېررورلۇق ھۇجۇمىغا قاتتىق نارازىلىق بىلدۈرۈپ مۇنداق دېدى:

«ئەڭ ئاخىرقى تېررورچى يوقىتىلغانغا قەدەر داۋاملىق بۇ تېررورچىلارنىڭ ئىزىغا چۈشىمىز، ئۇلارغا بۇ قىلمىشلىرىنىڭ ئازابىنى ھەسسىلەپ تېتىتىمىز، بۇنى ھەممەيلەن چوقۇم كۆرىدۇ، بۇنىڭغا ئىشىنىڭلار.»

جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى باشلىقى فاھرەتتىن ئالتۇن مۇنداق دېدى:

«دۆلىتىمىزگە قارىتىلغان تېررور تەھدىتى ئاخىرلاشقانغا قەدەر دۆلەت ئىچى-سىرتىدا ئېلىپ بېرىلىۋاتقان كۈرىشىمىز ئۈزلۈكسىز داۋاملىشىدۇ.»