qalin baku bixeterlik yighinida muhim söz qildi

türkiye awazi radiyosi xewiri: bixeterlik menbeliridin igilengen uchurlargha qarighanda, milliy istixbarat idarisi bashliqi ibrahim qalin 14-, 15-séntebir künliri ezerbeyjanda ötküzülgen baku bixeterlik yighinigha qatnashqan.

texminen 50 döletning istixbarat we bixeterlik  tarmaqlirining mesulliri qatnashqan baku bixeterlik yighinda rayon we dunyawi xirislar muzakire qilinghan.

ibrahim qalin yighindiki sözide yer sharidiki ishench kirizisi, künséri küchiyiwatqan térrorluq tehditi we ular keltürüp chiqiridighan insaniy aqiwetler heqqide toxtalghan.

ibrahim qalin ezerbeyjanning 44 künlük urushtin kéyin (2020-yili öktebirdin noyabirghiche) ishghaliyettin qutuldurghan qarabaghning turmushini normallashturush yolida tashlighan muweppeqiyetlik qedemlirini tilgha élip, erméniye bilen ezerbeyjanning menggülük tinchliq kélishimi tüzüshining kawkaz rayonining muqimliqi we tereqqiyati üchün intayin muhimliqini tekitligen.

ornitilidighan menggülük tinchliqning yene zengezur karidorining échilishini öz ichige alghan ezerbeyjan-erméniye-nahchiwan-türkiye-yawropa liniyelirining  özara ulinishigha kapaletlik qilidighanliqini tekitligen qalin, téz sürette özgiriwatqan we künséri ajizlishiwatqan xelqara sistémining ukraina we ghezze urushlar netijiside ikki muhim yershariwi  kirizisqa duch kelgenlikini qeyt qilghan.

u rusiye-ukraina urushini xelqara qanun asasida yéngi bixeterlik binakarliqi berpa qilish arqiliq hel qilish kéreklikini tekitlep, 40 mingdin artuq pelestinlikning ölümini keltürüp chiqarghan ghezzediki urushni toxtitish kélishimining baldurraq hasil qilishining intayin zörür ikenlikini hemde üzül-késil tinchliqqa kapaletlik qilishning birdinbir yolining israiliyening ishghaliyitige xatime bérip, ikki döletlik hel qilish charisini yolgha qoyush ikenlikini eskertti.

qalin yene türkiyening ukraina we ghezze urushini axirlashturush üchün ochuq we yépiq shekilde köp tereplik istixbarat diplomatiyesini dawamlashturidighanliqini tekitlidi.

térorluqning yershari xaraktérlik tehdit ikenlikini, barliq térrorluq teshkilatlirigha qarshi küreshning birlikte élip bérilishi kéreklikini otturigha qoyghan qalin, térrorluq teshkilatlirini ayrip qarighili bolmaydighanliqini, hemme adem bixeter bolmay turup, héchkimning bixeter bolalmaydighanliqini sözlirige ilawe qildi.