fidan: ikki döletlik tüzüm israiliye üchünmu tépilghusiz pursettur
dölitimiz (türkiye jumhuriyiti) tashqi ishlar ministiri xaqan fidan hem israiliye hem pelestin tinch we bixeter bille yashiyalaydighan ikki döletlik tüzümning israiliye üchünmu tépilghusiz tarixiy purset ikenlikini éytti.
türkiye awazi radiyosi xewiri: ministir fidan ammiwi ortaqlishish tor béti X sehipiside élan qilghan bayanatida, islam hemkarliq teshkilati - ereb elliri ittipaqi alaqe guruppisigha eza döletlerning tashqi ishlar ministirliri bilen birlikte ispaniye tashqi ishlar weziri josé manuél albarésning sahibxaniliqida madridta ispaniye, slowéniye, norwégiye, irélandiye we yawropa ittipaqining wekilliri bilen körüshkenlikini, ispaniyening pelestin dawasini qollighanliqidin intayin xursen ikenliklirini tekitlep mundaq dédi:
«ispaniye bash weziri pédro sanchéz bilenmu körüshken madridtiki uchrishishlirimizda, kirizisni ikki döletlik tüzüm arqiliq hel qilish pilanigha qarita qollashning barghanséri yüksek sewiyege yétiwatqanliqini tonup yettuq. barghanséri köpligen yawropa döletlirining pelestinni étirap qilishi we xelqara sot mehkimisidiki israiliyeni sotlash ishlirini qollawatqan döletlerning barghanséri köpiyishi adalet ornitilishigha kapaletlik qilish üchün bizge ümid chirighi yandurmaqta.»
«israiliyening héchqandaq bedel tölimesliki we amérakining israiliyeni shertsiz qollishi xelqara sistémini weyran qildi, buni hazir gherb döletlirimu chüshinip yetti.»
«dunya jamaetchiliki pelestin mesilisige israiliye we israiliyening qollighuchilirining nuqtiiynezeridin qaraydighan dewr axirlashti. derweqe, nöwette insaniyet dunyasining wijdani oyghandi. hem israiliye hem pelestin tinch we bixeter bille yashiyalaydighan ikki döletlik tüzüm israiliye üchünmu tépilghusiz tarixiy pursettur. israiliyening bu pursetni qachurup qoymasliqini ümid qilimiz.»
