fidan: nétanyahuni qollashni dawamlashturuwatqanlar irqiy qirghinchiliq jinayitining shérikliridur

türkiye awazi radiyosi xewiri: ministir fidan misirning paytexti qahirede ötküzülgen ereb elliri ittipaqi tashqi ishlar ministirlirining 162-qétimliq yighinida söz qildi.

israiliyening quddusning kimlikini özgertish we herem-sherifning tarixiy salahiyitige dexli qilish urunushlirining mesuliyetsizlik ikenlikini otturigha qoyghan ministir xaqan fidan: «yüzlerche ashqun israiliyelikning saqchilarning qoghdishi astida herem-sherifke hujum qilishi qebih ighwagerchiliktur» dégenlerni qeyt qildi.

u ministirlarning bu xil ighwagerchiliklerge arilishishining israiliye hökümitining exlaqiy yimirilish derijisini körsitip béridighanliqini tekitlep: « hemme adem shuni bilishi kérekki, islam dunyasi herem sherifning islamiy kimlikini pütün küchi bilen qoghdaydu. yene shundaq roh bilen, hemmimiz ortaq heriket qilip xelqara jemiyetke israiliyening qilmishlirini toxtitish üchün bésim ishlitishni dawamlashturimiz» dédi.

türkiyening jenubi afriqaning israiliye üstidin xelqara sot mehkimisige sunghan erznamisige arilishish iltimasini mehkimige tapshurghanliqini eskertken fidan, ghezzede tökülüwatqan qanning israiliyening ilgiriki hujumlirining jazalanmighanliqining biwasite netijisi ikenlikini tekitlidi.

ministir fidan: «bu qétim u bashqiche bolushi kérek. jawabkarlar choqum xelqara sotlarda jawabkarliqqa tartilishi kérek. bir ishni aydinglashturuwélish kérek: nétanyahuni qollashni dawamlashturuwatqanlar dawamlishiwatqan irqiy qirghinchiliqning shérikliri bolup, ularmu jawabkarliqqa tartilidu» dégenlerni sözlirige ilawe qildi.