ئەلى يەرلىكايا تېررورلۇققا قارشى كۈرەش ھەققىدە يېڭى ئۇچۇر بەردى

تۈركىيە ئاۋازى رادىيوسى خەۋىرى: ئىچكى ئىشلار مىنىستىرى ئەلى يەرلىكايا ئىجتىمائىي ئالاقە ئادرېسىدىكى باياناتىدا، بىخەتەرلىك قىسىملىرىنىڭ شىرناكنىڭ جۇدى تېغى يېزىلىرىدا «گۇرز -12» ھەرىكىتىنى ئېلىپ بارغانلىقىنى ئېيتتى.

مىنىستىر يەرلىكايا ھەرىكەت جەريانىدا تېررورچىلار ئوق- دورا ئىسكىلاتى سۈپىتىدە پايدىلىنىۋاتقان ئۆڭكۈرنىڭ بايقالغانلىقىنى، نۇرغۇن پارتلاتقۇچ دورا، قورال ۋە تۇرمۇش ماتېرىياللىرىنىڭ قولغا چۈشۈرۈلگەنلىكىنى ھەمدە ئۆڭكۈرنىڭ پارتلىتىۋېتىلگەنلىكىنى بىلدۈردى.

يەرلىكايا يازمىسىدا مۇنداق دېدى:

«تېررورلۇق تەشكىلاتى ئەشيا ئوبوروتى ئۈچۈن ئىشلىتىش ۋە ھەرىكەت ئېلىپ بېرىش ئۈچۈن تەييارلىغان ئۆڭكۈرلەر بايقالدى ۋە يوق قىلىندى. ئەزىز مىللىتىمىزنىڭ يىلنىڭ 365 كۈنىدە، 4 پەسىل، 12 ئاي، كېچە-كۈندۈز ھەم شەھەر، ھەم يېزىلاردا ھەرىكەت قىلىۋاتقانلىقىمىزنى بىلىشىنى ئۈمىد قىلىمەن. تېررورلۇققا قارشى كۈرىشىمىز ئەڭ ئاخىرقى بىر تېررورچى ئۇجۇقتۇرۇلغانغا قەدەر قەتئىيلىك بىلەن داۋاملىشىدۇ. بۇ ھەرىكەتلەرنى ئېلىپ بېرىۋاتقان قەھرىمان قوراللىق ساقچى-ئەسكەرلىرىمىزنى تەبرىكلەيمەن.»