abbas (t b m m de): pelestin hökümitining barliq ezaliri bilen birlikte ghezzege barimen

türkiye awazi radiyosi xewiri: pelestin dölet reisi mehmud abbas türkiye büyük millet mejlisi (t b b m) de chaqirilghan pelestinge munasiwetlik pewquladde yighinda söz qilip, özlirining jumhur reis rejep tayyip erdoghanning rehberlikidiki türkiyening bashlamchi rolini we pelestin xelqining qanunluq hoquqini qoghdashtiki meydanini qedirleydighanliqini tekitlidi.

türkiyening israiliyening ghezzediki irqiy qirghinchiliqigha taqabil turush üchün jenubiy afriqa teripidin xelqara edliye sotigha sunulghan délogha arilishish qararinimu qizghin qarshi alidighanliqini bildürgen abbas, türkiyening ghezzege nechche on ming tonna insanperwerlik yardimi ewetkenlikige rehmet éytti.

«israiliyening ghezze, iyordan deryasining gherbiy qirghiqi we quddusta élip barghan irqiy qirghinchiliqning asasliq meqsiti weten zéminimizdin pelestinning mewjutluqini yulup tashlap, pelestinliklerni yene bir qétim chégradin qoghlap chiqirish» dégen mehmud abbas: «ular néme qilsa qilsun, bu hergiz emelge ashmaydu. xelqimiz zéminigha, muqeddes nersilirige, wetinige sadiq bolup, qandaq bolushidin qetiynezer, ular bulangchilarni we tajawuzchilarni u yerdin qoghlap chiqiridu» dédi.

qeddilirini tik tutqan halda zéminliridin chiqip ketmeydighanliqlirini tekitligen abbas: «ghezze pelestin dölitining ayrilmas bir qismi. ghezzede bashqa bir dölet qurghili bolmaydu we ghezzesiz pelestin döliti bolmaydu» dédi.

u qatillar we urush jinayetchilirining sadir qilghan jinayetlirining jawabkarliqidin qéchip qutulalmaydighanliqini tekitlidi.

«aldimizda héchqandaq chare qalmidi, shunglashqa men we pelestin hökümitining barliq ezaliri ghezzege bérishni qarar qilduq, biz buni qilimiz. bizning hayatimiz ghezzediki her qandaq bir balining hayatidin qimmetlik emes» dégen pelestin dölet reisi mehmud abbas, sözini dawamlashturup: «tinchliq we bixeterlikning yoli pelestindin bashlinip, pelestinde axirlishidu» dégenlerni sözlirige ilawe qildi.

jumhur reis erdoghanmu mejlis yighin zalidin orun alghan türkiye büyük millet mejilisi (t b b m) omumiy kéngishide, iranning paytexti téhranda suyiqestke uchrighan hamas siyasiy biyurosi reisi ismail heniyyening süritigimu orun bérildi.

parlamént reis diwani we parlaménti ezaliri olturghan orunduqlargha pelestin we türkiye bayriqi chüshürülgen sharpilar qoyuldi.