erdoghan gutérrésqa inkas qayturdi
dölitimiz (türkiye jumhuriyiti) jumhur reisi rejep tayyip erdoghan birleshken döletler teshkilati xewpsizlik kéngishi qurulmisining tüptin özgertilishi kéreklikini bildürdi.
türkiye awazi radiyosi xewiri: jumhur reis rejep tayyip erdoghan ammiwi ortaqlishish tor bétidiki sehipiside élan qilghan bayanatida, birleshken döletler teshkilati bash katipi antonyo gutérrésning afriqa qitesi heqqidiki yazmisigha jawab qayturdi.
erdoghan jawabida mundaq dédi:
«hörmetlik bash katip ependim! birleshken döletler teshkilati xewpsizlik kéngishini bügünki shert – sharaitlargha mas kélidighan we adil shekilde islah qilish heqqidiki köz qarishingizni semimiy we yuqiri awazda bayan qilishingiz, dunyaning yene bir qétim adil tüzümge ige bolushi üchün intayin qimmetliktur.»
afriqa qitesi we barliq afriqaliqlarghimu choqum bu adil sistémigha töhpe qoshush pursiti yaritip bérish kéreklikini qeyt qilghan erdoghan, mundaq dep körsetti:
«dunyamizda urush otliri etrapimizni téximu köp qaplap ketmestin, téximu köp insanlar we jemiyetler derd - elem tarmastin, téximu köp mesum kishilerning qéni tökülmestin burun, dunyaning tinchliqi we bixeterlikige kapaletlik qilish wepisini ada qilishtin tolimu yiraq bolghan birleshken döletler teshkilati xewpsizlik kéngishining qurulmisini tüptin özgertish kérek. derweqe, pütkül dunya ellirining bizdin kütüwatqinimu del mushu. biz dunya ellirining bu ümidlirige jawaben, dawamliq <dunya 5 tinmu chong> déyishni we <téximu adil bir dunya berpa qilish mumkin> éngigha asasen heriket qilishni dawamlashturimiz. türkiye bolush süpitimiz bilen, adil bir xelqaraliq sistéma ornitilishi we birleshken döletler teshkilati xewpsizlik kéngishining qurulmisining hazirqi shert – sharaitlirimizgha mas kélidighan shekilde islah qilinishi yolida pütün küchi bilen tirishchanliq körsitiwatqan barliq dostlirimizni dawamliq qollaymiz.»
birleshken döletler teshkilati bash katipi antonyo gutérrés, birleshken döletler teshkilati xewpsizlik kéngishi yighinida, afriqa qitesiningmu xewpsizlik kéngishide wekili bolushi kéreklikini otturigha qoyghan, xewpsizlik kéngishining qurulmisini afriqa qitesigmu wekillik qilidighan shekilde islah qilishqa jiddiy éhtiyaj barliqini tekitligenidi.
