مىنىستىر فىدان تۈركمەنىستان دىپلوماتىيە مىنىستىرى بىلەن كۆرۈشتى

تۈركىيە ئاۋازى رادىيوسى خەۋىرى: تۈركىيە تاشقى ئىشلار مىنىستىرلىقىنىڭ ئاممىۋى ئورتاقلىشىش تور بېتى X سەھىپىسىدە، بۇ ھەقتە ئېلان قىلىنغان باياناتىدا، مۇنداق دېيىلدى:

«تاشقى ئىشلار مىنىستىرىمىز خاقان فىدان پايتەخت ئەنقەرەدە تۈركمەنىستان مىنىستىرلار كېڭىشىنىڭ مۇئاۋىن رەئىسى، قوشۇمچە دىپلوماتىيە مىنىستىرى راشىد مېرېدوۋ بىلەن بىر يەرگە جەم بولدى.»

دىپلوماتىك مەنبەلەرنىڭ بىلدۈرۈشىچە، فىدان بىلەن مېرېدوۋنىڭ ئۇچرىشىشىدا، ئىمزالىنىدىغان يېڭى كېلىشىملەر ئارقىلىق ئىقتىسادىي ساھەدە تۈركىيە – تۈركمەنىستان ئوتتۇرىسىدىكى ھەمكارلىقنى چوڭقۇرلاشتۇرۇش ئىمكانىيەتلىرى ھەققىدە مۇزاكىرە ئېلىپ بېرىلغان. شۇنداقلا ئىككى دۆلەت ئوتتۇرىسىدىكى 5 مىليارد دوللارلىق سودا ئومۇمىي سوممىسىنى يەنىمۇ يۈكسەك سەۋىيەگە يەتكۈزۈش نىشانى توغرۇلۇق ئۆزئارا پىكىر ئالماشتۇرۇلغان.

ئىككى مىنىستىر، ئىككى دۆلەت ئوتتۇرىسىدىكى تىرانسپورت ئىشلىرىنى قولايلاشتۇرۇش يولىدا تاشلىنىدىغان قەدەملەر، تۈركمەنىستاننىڭ تەبىئىي گازىنى تۈركىيە ۋە ياۋروپا بازىرىغا يەتكۈزۈشتىكى ھەمكارلىق پۇرسەتلىرى، غەززە رايونىنىڭ نۆۋەتتىكى ۋەزىيىتى، ئۇكرائىنادىكى ئۆزگىرىشلەر ھەققىدە مۇزاكىرە ئېلىپ بارغان.