ئىراقنىڭ شىمالىدا تېررورچىلارغا ئېغىر زەربە بېرىلدى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى دۆلەت مۇداپىئە مىنىستىرلىقى ئىجتىمائىي تاراتقۇدىكى ئادرېسىدا ئىراقنىڭ شىمالىدا ئېلىپ بېرىلغان زەربە بېرىش ھەرىكىتى توغرىسىدا بايانات ئېلان قىلدى.

«تېررورچىلار ئۆزلىرىنى كۈتۈۋاتقان (يامان) ئاقىۋەتتىن قېچىپ قۇتۇلالمايدۇ!» دېگەن ئىبارىلەرگە ئورۇن بېرىلگەن باياناتتا، ئىراقنىڭ شىمالىدىكى <پەنچە-قۇلۇپ> ھەربىي ھەرىكىتى رايونىدا ئېلىپ بېرىلغان زەربە بېرىش ھەرىكىتىدە پ ك ك ئەزاسى 17 تېررورچىنىڭ ئۇجۇقتۇرۇلغانلىقى قەيت قىلىندى.

باياناتتا يەنە: «<پەنچە-قۇلۇپ> ھەربىي ھەرىكىتى رايونىدا ئۇنتۇلماس قەھرىمانلىقلارنى نامايان قىلغان، ئەڭ خەتەرلىك ۋە ئەڭ مۇشەققەتلىك تاغلىق رايوندا تېررورچىلارنىڭ ئۇۋىلىرىنى بىتچىت قىلىۋاتقان قورقماس تۈركىيە ئەسكەرلىرى، پ ك ك تېررورلۇق تەشكىلاتىنى رايوندىن سۈپۈرۈپ تاشلاش كۈرىشىنى داۋاملاشتۇرماقتا» دېيىلدى.