türkiye irqiy qirghinchiliq délosigha terep boldi

türkiye awazi radiyosi xewiri: türkiyening laheyde turushluq bash elchisi selchuq ünal bilen türkiye büyük millet mejlisi (TBMM) parlamént ezaliridin terkib tapqan wekiller ömiki bügün türkiyening délogha terep bolidighanliqi toghrisidiki iltimasini xelqara sot mehkimisi katibat bashqarmisigha tapshurdi.

shundaq qilip, türkiye nikaragua , kolombiye, liwiye, méksika, pelestin we ispaniyedin kéyin, jenubiy afriqa jumhuriyiti israiliye üstidin xelqara sot mehkimisige sunghan irqiy qirghinchiliq délosigha arilishidighanliqini élan qilghan yettinchi döletke aylandi.

türkiye büyük millet mejilisi bashliqi numan qurtulmush bu heqte bayanat bérip, «israiliyening irqiy qirghinchiliq jinayitining xelqara sotlarda sotlinishi, israiliye bash ministiri bényamin nétanyahu we shaykisining sadir qilghan jinayetlirining tégishlik jazagha tartilishi üchün, xizmetlirimizni dawamlashturimiz» dédi.

türkiye jumhuriyiti tashqi ishlar ministiri xaqan fidan özining ijtimaiy alaqe toridiki adrésida bu mesile toghrisida bayanat élan qilip: «biz bir az burun israiliyege qarshi turghuzulghan irqiy qirghinchiliq délosigha arilishish iltimasimizni xelqara jinayi ishlar sot mehkimisige tapshurduq. sadir qilghan jinayetlirining jawabkarliqining sürüshtürülmeslikidin ilham alghan israiliye, künséri téximu köp bigunah pelestinlikni öltürmekte. xelqara jemiyet irqiy qirghinchiliqni toxtitish üchün yolida qilidighan ishlirini qilishi؛ israiliye we uning qollighuchilirigha tégishlik derijide bésim ishlitishi kérek. türkiye bu yolda qolidin kélidighan barliq tirishchanliqni körsitidu» dégenlerni qeyt qildi.