erdoghan iraq ziyaritini tamamlidi

türkiye awazi radiyosi xewiri: jumhur reis rejep tayyip erdoghan iraq kord rayonluq hökümiti reisi nechirwan barzani, bash ministiri mesrur barzani we ularning hemrahliqidki wekiller ömiki bilen iraqning erbil shehiride körüshüp, rayon, xelqara we térrorizmgha qarshi küresh mesililiri boyiche söhbetleshti.

jumhur reis erdoghan uchrishishta, iraqning kündin-künge zorawanliqtin yiraqlashqanliqini körüshning kishini xushal qilidighanliqini bildürüp, p k k térrorluq teshkilatini küntertiptin chiqirip tashlash waqtining yétip kelgenlikini, türkiyening térrorluqqa qarshi hemkarliqigha alahide ehmiyet béridighanliqini we uni téximu yuqiri pellige kötürüsh iradisining qetiy ikenlikini otturigha qoydi.

jumhur reis erdoghan iraq bilen intayin keng dairilik qanuniy kélishimlerning imzalanghanliqini we bu hemkarliq pilanining iraq kord rayonluq hökümiti rayoninimu öz ichige alidighanliqini bildürdi.

paytext baghdadta imzalanghan ramka kélishimi arqiliq dunyagha élan qilinghan «tereqqiyat yoli» türining pütkül iraqning parawanliqi we tinchliqigha xizmet qilidighanliqini tekitligen jumhur reis erdoghan, baghdad we erbil hökümetlirining üchinchi tereplerning arilishishlirigha yoq qoymay, saghlam söhbet we xizmet liniyesi tesis qilishi kéreklikini tekitlidi.

türkiyening iraq kord rayonluq hökümiti bilen bolghan soda munasiwitini ilgiri sürüsh arzusini tilgha alghan jumhur reis erdoghan, derejik-zeti tamozhna éghizidin mashinilarning ötüshige ruxset qilishning muhimliqini eskertti.

u yene, rayondiki türkmenlerning hoquqi we menpeetining, bolupmu ularning siyasiy wekillik hoquqining qoghdilidighanliqigha ishinidighanliqini bildürdi.

iraq kord rayonluq hökümitimu jumhur reis erdoghanning ziyariti heqqide yazma bayanat élan qildi؛ bayanatta, iraq kord rayonluq hökümiti reisi nechirwan barzani we bash ministiri mesrur barzanining jumhur reis erdoghan bilen körüshüp, türkiye bilen her sahediki munasiwetni tereqqiy qildurushni xalaydighanliqini bildürgenlikini, qiyin waqitlarda iraq kord rayonluq hökümitige qilinghan yardemler hemde ornitilghan hemkarliqlar üchün, türkiyege minnetdarliq bildürülgenliki qeyt qilindi.

jumhur reis erdoghan iraqtiki ziyaritini tamamlap paytext enqerege qaytip keldi.