fidan: pelestinni qollash namayishlirini cheklep, quran kerimge hujum qilishqa yol qoyush qosh ölchemdur

türkiye awazi radiyosi xewiri: dölitimiz (türkiye jumhuriyiti) tashqi ishlar ministiri xaqan fidan yawropa ittipaqining türkiyediki wekilliri bashliqi, bash elchi nikolas méyir-landrut we yawropa ittipaqigha eza döletlerning enqerede turushluq bash elchilirini tashqi ishlar ministirliqi qarmiqidiki yawropa ittipaqi bashqarmisi binasida qobul qildi.

diplomatik menbelerdin igilengen uchurlargha asaslanghanda, fidan bash elchilerni kütüwélish jeryanida bezi uchurlarni bergen.

u ghezzege alaqidar özgirishler toghrisida toxtilip, puqralarni zerbe obyékti qilghan hujumlarning qobul qilghili bolmaydighanliqini, ularni derhal toxtitip, urush toxtitish élan qilinishi kéreklikini tekitligen.

«biz toqunushning rayon sewiyesige yétip qélishining aldini élishimiz kérek. ikki döletlik hel qilish charisini nishan qilghan tinchliq musapisi qobul qilinghan paramétirlar dairiside tézdin bashlishi kérek. bu arqa körünüshte, biz képillik méxanizmidin paydilinishqa bolidighanliqigha ishinimiz» dégen fidan, sözini dawamlashturup: «bir qisim yawropa döletliride pelestinni qollash namayishlirigha cheklesh tedbirliri yolgha qoyulup, muqeddes kitabimiz quran kerimge qilinghan hujumlargha pikir erkinliki nami astida ruxset qilinishi qosh ölchemdur» dégenlerni qeyt qilghan.

ministir fidan tertipsiz köchmenlikke taqabil turush mesilisidimu yawropa ittipaqining 18- mart kélishimining telipini orundishi we téximu köp yükni ortaqlishishi kéreklikini tilgha élip: «térrorluqqa qarshi turushta téximu küchlük hemkarliq ornitishimiz kérek. türkiye etrapimizdiki mesililerning hel qilinishida intayin muhim rol oynaydu. yawropa ittipaqining türkiyege yiraqni körerlik bilen yéqinliship, ushshaq- chüshshek siyasiy pilanlarni bir chetke qayrip qoyushini ümid qilimiz» dégen.

yighinda balqan, kawkaz, ottura asiya we ukraina urushi qatarliq nöwettiki mesililermu muzakire qilinghan.