chawushoghlu amérikadiki «türk öyi»ge qilinghan hujum heqqide toxtaldi

türkiye awazi radiyosi xewiri: dölitimiz tashqi ishlar ministiri mewlüt chawushoghlu amérika qoshma ishtatlirining niyu york shehiridiki «türk öyi»ge qilinghan hujum heqqide toxtilip: «türk öyiningla emes, amérikadiki bashqa wakaletxanilirimizningmu bixeterlikige kapaletlik qilinishini telep qilduq» dédi.

ministir mewlüt chawushoghlu bir téléwiziye qanilining neq meydan söhbet pirogrammisida, amérikadiki türk öyige qilinghan hujum heqqide melumat bérip, hujumchi téxi tutulmighan bolsimu, körünüshlirining barliqini, uni qolgha chüshürüsh üchün jiddiy tirishchanliq körsitiliwatqanliqini bildürdi.

ministir chawushoghlu rayonda qoshumche tedbirlerning yolgha qoyulghanliqini, bir saqchi ponkitining qurulidighanliqini, ponkit qurulup bolghuche niyu york saqchi mashinilirining postta turidighanliqini tilgha élip, hujumning néme meqsette qilinghanliqining éniq emeslikini, emma hujumchi qolgha chüshürülgende mesilining aydinglishidighanliqini éytti.

u barmaq izi tépilghan hujumchining qolgha chüshürülüshining waqit mesilisi ikenlikini eskertip: «biz (amérika) tashqi ishlar ministirliqining niyu york saqchiliri bilen birlikte bu mesilini yéqindin közitiwatqanliqini körüwatimiz. eng yéngi özgirishler toghrisida amérika bash elchisi jéf fléyk uchur yollidi, arqidin téléfonlashtuq, mesilige yéqindin köngül bölgenliki üchün uninggha rehmet éyttuq» dédi.

mewlüt chawushoghlu amérika qoshma ishtatlirining sahibxan dölet bolush süpiti bilen, diplomatik orunlarni qoghdashqa mesul ikenlikini tekitlep: «biz bu kishining baldurraq qolgha chüshürülüshini kütüwatimiz. biz qoshumche bixeterlik tedbirlirining türk öyi üchünla emes, belki bizning amérikadiki bashqa wakaletxanilirimiz üchünmu yolgha qoyulushini telep qilduq. bash elchimiz, dostlirimiz, enqeredin biz bolup hemmimiz mesilini yéqindin közitiwatimiz» dégenlerni qeyt qildi.