erdoghan: amérika-xitay ziddiyiti héchkimge paydiliq bolmidi
türkiye jumhur reisi rejep tayyip erdoghan amérika-xitay arisidiki ziddiyetlerning héchkimge paydisining bolmighanliqini, yéngi soghuq urushningmu héchkimge paydiliq bolmaydighanliqini bildürdi.
türkiye awazi radiyosi xewiri: jumhur reis rejep tayyip erdoghan «kriter» (ölchem) zhurnilining ziyaritini qobul qildi.
u amérika-xitay otturisidiki ziddiyetler bilen iran-seudi erebistan yéqinlishishi, tashqi siyasettiki özgirishler toghrisida toxtilip: «xelqaraliq siyaset intayin murekkep, nurghun éniqsizliqlar bar. wuxen wirusi (Kovid-19) biz duch kéliwatqan éniqsizliqlarni téximu ashurdi. uningdin kéyin, ukraina-rusiye urushi bilen xelqaraliq tüzümning özgirishi we özgirish heqqidiki munazireler qaytidin ewj aldi. yershari riqabitimu bu tüzümge téximu köp tesir körsitishke bashlidi. iqtisadiy, siyasiy we herbiy özgirishler bir-biri bilen gireliship ketken weziyette turmaqta» dédi.
u amérika-xitay ziddiyitining héchkimge paydiliq bolmighanliqini tekitlep: «yéngi soghuq urushning héchkimge paydisi yoq. chünki yalghuz küresh qilip muweppeqiyet qazinalmaydighan mesililer bar. mesilen, kilimat özgirishi eng muhim mesililerning biri we birlikte heriket qilish kérek bolghan sahe. térrorluqmu biz birlikte heriket qilish arqiliq yingeleydighan mesile» dédi.
u birleshken döletler teshkilatini islah qilip, yer sharini téximu yaxshi bashqurush qurulmisini berpa qilish kéreklikini eskertip: «mushundaq muhim mesililer bar waqitta, amérika bilen xitay otturisidiki siyasiy we herbiy ziddiyetler, muqimliqni buzidighan tesir peyda qilidu. bizning qarishimizche, iran bilen seudi erebistanning söhbetlishish arqiliq munasiwetlirini normallashturushi, ottura sherqning dawamlishiwatqan normallishish musapisigha aktip hesse qoshidu» dédi.
u yéngi dewrde tashqi siyasette türkiyening yönilishini mustehkemleshni meqset qilidighanliqlirini tekitlep: «bizning meqsitimiz türkiyening yersharidiki rolini téximu mustehkemlesh» dédi.
u axirida süriyediki térrorluq toghrisida toxtilip: «térorluq axirlashqiche dawamliq küresh qilimiz. siyasiy hel qilish charisi, térorluqqa qarshi küresh we musapirlarning qaytishi mesililirini birlikte hel qilish kérek. yéngi dewrde biz bu jehette téximu köp ishlarni qilimiz» dédi.
