chawushoghlu: lawrow türkiyeni ziyaret qilidu
tashqi ishlar ministiri chawushoghlu rusiye tashqi ishlar ministiri lawrowning 6-7-aprél künliri türkiyeni ziyaret qilidighanliqini bildürdi.
türkiye awazi radiyosi xewiri: türkiye tashqi ishlar ministiri mewlüt chawushoghlu türkiye, rusiye, süriye we iran qatarliq döletler muawin ministir sewiyeside qatnishidighan töt terep yighinining 3-4-aprél künliri rusiye paytexti moskwada échildighanliqini élan qildi.
tashqi ishlar ministiri chawushoghlu b d t diki 30-mart xelqaraliq nöl exlet küni munasiwiti bilen ötküzülgen yighingha qatnishish üchün yétip kelgen niyu yorkta, türk öyide bir guruppa türkiyelik muxbirlar bilen tashqi siyasettiki özgirishler toghrisida söhbet ötküzdi.
u rusiye tashqi ishlar ministiri sérgéy lawrowning türkiye ziyariti toghrisidiki soalgha, qahramanmarashta yüz bergen yer tewresh apetliridin kéyin, türkiyeni ziyaret qilmaqchi bolghan lawrowning 6-7-aprél türkiyede bolidighanliqini, ziyarette ikki terep munasiwetliride saqliniwatqan oxshimighan mesililerning muzakire qilindighanliqini éytti.
u yer tewersh apetliridin kéyin rusiyening köp yardemlerni qilghanliqini xatirilitip: «keng dairide söhbetlishidighan témilar bar. ashliq kélishimini uzartish mesilisimu bar. 30-mart b d t bash katipi bilenmu ashliq kélishimi toghrisida söhbetleshtuq. rusiye ashliq kélishimini 60 kün uzartilishigha qoshuldi. 120 kün uzartish hazirche éniq emes, bu mesililer üstidimu söhbetlishimiz» dédi.
u lawrow bilen süriye, liwiye we bashqa rayon mesililerningmu muzakire qilinidighanliqini bildürüp, süriyege munasiwetlik siyasiy musape, köchmenlerning ehwali we yer tewreshlerdin kéyin u yerlerge qilinidighan insanperwerlik yardemlerni köpeytish mesililiriningmu muzakire qilinidighanliqini eskertti.
u axirida, muawin tashqi ishlar ministirliri sewiyeside ötküzülidighan töt terep yighinining 3-4-aprél künliri moskwada échilidighanliqini bildürdi.
