türkiye büyük millet mejlisi finlandiyening natogha eza bolushini testiqlidi
finlandiyening nato (shimaliy atlantik ehdi teshkilati, sh a e t) gha eza bolushi toghrisidiki kélishimni testiqlash qanun teklipi, türkiye büyük millet mejlisi (parlaménti) ning omumiy yighinida qobul qilindi.
türkiye awazi radiyosi xewiri: nato bash katipi jéns stolténbérg bu qanun layihesining türkiye milliy mejliside maqullanghanliqini memnunluq bilen qarshi alghanliqlirini bildürdi.
u twittérda uchur hembehirlep: «bu barliq nato ailisini téximu küchlük we téximu bixeter qilidu» dédi.
finlandiye pirézidénti sauli ninishtemu twittérda bu heqte uchur hembehirlep, natoning 30 ezasining finlandiyening ezaliqini testiqlighanliqini bildürdi.
u bu döletlerge finlandiyege ishengenliki we qollighanliqi üchün teshekkür éytip: «finlandiye natoning bixeterlikige özini atighan küchlük we iqtidarliq ittipaqdash bolidu. finlandiye natogha qoshulushqa teyyar. biz shiwétsiyening baldurraq bizge qoshulushini töt köz bilen kütimiz» dédi.
finlandiye bash ministiri sanna marinmu qollighan barliq döletlerge teshekkür éytip: «biz ittipaqdash bolush süpitimiz bilen özara bixeterlikimizni kapaletke ige qilimiz, bir-birimizni qoghdaymiz. finlandiye hazir we kelgüside shiwétsiyening yénida, natogha kirishini qollaydu» dédi.
finlandiye tashqi ishlar ministirliqimu twittérda natogha eza bolush jeryani toghrisida hembehirligen uchurda: «rehmet! biz türkiye büyük millet mejlisining finlandiyening natogha eza bolushini testiqlighanliqidin minnetdarmiz» déyildi.
