ئەردوغان پۇرسەت تاپسىلا ئاپەت رايونىغا بېرىپ خىزمەتلەرنى يېقىندىن كۆزىتىدىغانلىقىنى ئېيتتى

تۈركىيە ئاۋازى رادىيوسى خەۋىرى: جۇمھۇر رەئىس ئەردوغان خاتايدىكى كوللېكتىپ ئىپتار زىياپىتىدىكى سۆزىدە، 6-فېۋرالدىكى يەر تەۋرەشتە ئېغىر ۋەيرانچىلىققا ئۇچرىغان رايونلاردا ئېلىپ بېرىلىۋاتقان خىزمەتلەر ھەققىدە مەلۇمات بېرىپ: «بۇنداق ئېغىر ئاپەتنى پەقەت ئۆزئارا ھەمكارلاشقىنىمىزدا، دۆلەت ۋە خەلق مۈرىنى مۈرىگە تىرىگىنىمىزدە، قەلبلەرنى بىرلەشتۈرگىنىمىزدىلا يېڭەلەيمىز. بىز ئەتىياز ۋە ياز ئايلىرىدىن ئەڭ ياخشى شەكىلدە پايدىلىنىپ، شەھەرلىرىمىزنى قايتا قۇرۇش  يولىدا كۆرۈنەرلىك مۇساپىنى بېسىپ ئۆتۈشنى خالايمىز» دېدى.

جۇمھۇر رەئىس ئەردوغان خاتاينى ئۇل ئەسلىھەسى ۋە مەدەنىيەت بايلىقلىرى بىلەن بىرلىكتە ئەسلىگە كەلتۈرۈش ئۈچۈن، ۋاقىتقا قارشى كۈرەش قىلىۋاتقانلىقلىرىنى بىلدۈرۈپ: «تۇرمۇش نورمال ھالەتكە قايتىپ بولغۇچە شەھەرلىك ھۆكۈمەتلىرىمىز پائالىيەتلىرىنى داۋاملاشتۇرىدۇ، بىزمۇ پۇرسەت تاپساقلا بۇ يەرلەرگە كېلىپ، ئازابلىرىڭلارنى ئورتاقلىشىمىز، قىلىنىۋاتقان خىزمەتلەرنى يېقىندىن كۆزىتىمىز» دېدى.