ئاقار تۈركىيەنىڭ ئاشلىق كارىدورى كېلىشىمىنىڭ مۇددىتىنى ئۇزارتىشقا تىرىشىۋاتقانلىقىنى ئېيتتى

تۈركىيە ئاۋازى رادىيوسى خەۋىرى: دۆلەت مۇداپىئە مىنىستىرى خۇلۇسى ئاقارنىڭ رىياسەتچىلىكىدە قۇرۇقلۇق ئارمىيەسى قوماندانلىق ئىشتابى قارمىقىدىكى ئىلغار بىرلەشمە ھەرىكەت مەركىزىدە چېگرا لىنىيەسى ۋە چېگرا سىرتىدىكى قىسىملارنىڭ قوماندانلىرىنىڭ ئىشتىراك قىلىشى بىلەن سىن كۆرۈنۈشلۈك تېلېفون يىغىنى چاقىرىلدى.

خۇلۇسى ئاقار يىغىندا، تۈركىيەنىڭ، 2022-يىلى 2-ئاينىڭ 24-كۈنى باشلانغان رۇسىيە-ئۇكرائىنا ئۇرۇشى پەيدا قىلغان «ئاشلىق كىرىزىسى» خەۋپىنى تۈگىتىش تىرىشچانلىقى سايىسىدا ھاسىل قىلىنغان «ئاشلىق كارىدورى»نىڭ نۆۋەتتىكى ئەھۋالى توغرىسىدا توختىلىپ: «ۋاقىت توشۇۋاتىدۇ. بىز بۇ كېلىشىمنى بۇرۇنقى پېتى داۋاملاشتۇرۇش ئۈچۈن، رۇسىيە ۋە ئۇكرائىنا بىلەن خەت - ئالاقە ۋە سۆھبەتلىرىمىزنى داۋاملاشتۇرۇۋاتىمىز» دېدى.

رايوندا ئۇرۇش توختىتىشنىڭ كاپالەتكە ئىگە قىلىنىپ، تۆكۈلۈۋاتقان قاننىڭ توختىشىنى ئارزۇ قىلىدىغانلىقىنى بىلدۈرگەن ئاقار، بۇنى كاپالەتلەندۈرۈش ئۈچۈن، جۇمھۇر رەئىس رەجەپ تاييىپ ئەردوغان ۋە ئالاقىدار مىنىستىرلارنىڭ سۆھبەتلەرنى داۋاملاشتۇرۇۋاتقانلىقىنى، كۆزلىگەن نەتىجىنىڭ قولغا كەلتۈرۈلۈشىنى ئۈمىد قىلىدىغانلىقىنى ئېيتتى.

تۈركىيە، ئۇكرائىنا، رۇسىيە ۋە بىرلەشكەن دۆلەتلەر تەشكىلاتى (ب د ت) ئوتتۇرىسىدا 22-ئىيۇل ئىستانبۇلدا ئىمزالانغان ئاشلىق كارىدورى كېلىشىمىنىڭ ۋاقتى بۈگۈن (18-مارت) توشىدۇ. كېلىشىمنىڭ مۇددىتىنى ئۇزارتىشنى مەزمۇن قىلغان سۆھبەتلەر داۋاملاشماقتا.