ئاقار: تېررورچىلارغا تىك ئۇچار بەرگەنلەر نەق مەيداندا پاش بولۇپ قالدى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى دۆلەت مۇداپىئە مىنىستىرى خۇلۇسى ئاقار ئىراقنىڭ شىمالىدا تېررورچىلارنى ئېلىپ كېتىۋاتقان ئەسنادا چۈشۈپ كەتكەن فىرانسىيەنىڭ ئايرباس شىركىتى ئىشلەپچىقارغان تىك ئۇچار ئايروپىلان توغرىسىدا توختىلىپ، «پ ك ك / ي پ گ قوللىغۇچىلىرى تېررورچىلارغا تىك ئۇچار بېرىش ئارقىلىق يەنە بىر قېتىم نەق مەيداندا پاش بولدى» دېدى.

ئاقار تۈنۈگۈن دۆلەت مۇداپىئە مىنىستىرلىقىدا ئۆتكۈزۈلگەن 18-مارت شېھىتلەرنى خاتىرىلەش كۈنى مۇراسىمىدا سۆز قىلىپ، «تېررورنى مەنبەسىدە يوقىتىش» ئىستراتېگىيەسى دائىرىسىدە دۆلەت ئىچى – سىرتىدا پ ك ك/ پ ي د-ي پ گ، دائېش ۋە فەتۆ (فەتھۇللاھچى تېررورلۇق تەشكىلاتى) قاتارلىق بارلىق تېررورلۇق تەشكىلاتلىرىغا قارشى كۈرەش قىلىنىۋاتقانلىقىنى ئېيتتى.

مىنىستىر ئاقار ئىراقنىڭ شىمالىدا تېررورچىلارنى ئېلىپ كېتىۋاتقان ئەسنادا چۈشۈپ كەتكەن تىك ئۇچار ئايروپىلان توغرىسىدا توختىلىپ:  «پ ك ك / ي پ گ قوللىغۇچىلىرى تېررورچىلارغا تىك ئۇچار بېرىش ئارقىلىق يەنە بىر قېتىم نەق مەيداندا پاش بولدى. ئۇلار بۇلارنىڭ بىھۇدە ئۇرۇنۇشلار ئىكەنلىكىنى چۈشىنىپ يېتىشى كېرەك. بىزنىڭ تېررورلۇققا قارشى كۈرىشىمىز ئاخىرقى تېررورچى بىر تەرەپ قىلىنىپ بولغۇچە ئۈزلۈكسىز داۋاملىشىدۇ» دېدى.

ئۇ 2015 – يىلى 25 – ئىيۇلدىن بۇيان دۆلەت ئىچى، ئىراق ۋە سۈرىيەنىڭ شىمالىدا بولۇپ جەمئىي 37 مىڭ 647 تېررورچى، پەقەت مۇشۇ يىل ئىچىدىلا 306 تېررروچىنىڭ بىر تەرەپ قىلىنغانلىقىنى ئېيتتى.

ئىراق كۇرد رايونلۇق ھۆكۈمىتى 15 – مارت ئىراقنىڭ شىمالىدىكى دۇخوكتا چۈشۈپ كەتكەن تىك ئۇچار ئايروپىلاندىكىلەرنىڭ بىر قىسىمنىڭ پ ك ك  تېررورلۇق تەشكىلاتى ئەزالىرى ئىكەنلىكىنى ئېلان قىلغانىدى.

بۇ جەرياندا، فىرانسىيە تاشقى ئىشلار مىنىستىرلىقى فىرانسىيەنىڭ ئايرباس شىركىتى ئىشلەپچىقارغان AS350 تىپلىق تىك ئۇچار ئايروپىلاننىڭ كىمگە تەۋە ئىكەنلىكى توغرىسىدىكى سوئاللارنى جاۋابسىز قالدۇردى؛ مىنىستىرلىق باياناتچىسى: «مەتبۇئاتلاردىكى كۆرۈنۈشلەردە تىك ئۇچارنىڭ رەت نومۇرى كۆرۈنۈپ تۇرىدۇ. فىرانسىيەلىكلەرنىڭ بۇ تىك ئۇچارنىڭ كىمگە سېتىلغانلىقىنى بىلىشى كېرەك ئەمەسمۇ؟» دېگەن سوئالغا «بۇنى ئىزاھلىمايمىز» دەپ جاۋاب بەردى.