nurghun döletler türkiyege qutquzush etretliri we yardem eshyalirini ewetishni dawamlashturmaqta

türkiye awazi radiyosi xewiri: yer tewresh rayoni üchün xelqaraliq yardemlerni öz ichige alghan tötinchi derijilik agahlandurush élan qilinghandin kéyin, türkiyege izdesh-qutquzush etriti ewetken tunji dölet ezerbeyjan boldi؛ nöwette ezerbeyjandin kelgen 400 din artuq izdesh - qutquzush xadimi apet rayonida wezipe ötimekte.

amérika qoshma ishtatliri 161 kishilik izdesh-qutquzush etriti ewetti, méksikadin 145 xadim yolgha chiqti, salwadormu 100 din artuq adem ewetidighanliqini uqturdi.

yawropa ittipaqi komissiyoni bayanat élan qilip, yawropa ittipaqining puqralarni qoghdash méxanizmi dairiside hazirghiche 30 izdesh-qutquzush we dawalash etritining türkiyege ewetilgenliki yaki ewetilidighanliqini uqturdi. 19 yawropa ittipaqi döliti bilen qaradagh we albaniyeni öz ichige alghan 21 yawropa dölitidin kelgen 1200 izdesh – qutquzush xadimi bilen  79 apsharkining rayonda wezipe öteydighanliqi bildürüldi.

engliyemu 77 izdesh-qutquzush mutexessisi, zamaniwi üsküniler we charlash itlirini türkiyege ewetkenlikini uqturdi.

girétsiye 21 ot öchürgüchining, ispaniye 90 kishilik kespiy etretning yolgha chiqidighanliqini élan qilghan bolsa, bir qisim yawropa döletliridin türkiyege ewetilgen kishi sani töwendikiche:

«firansiye 139, awstriye 105, shiwéytsariye 80, malta 32, bulghariye 59, kosowo 30, wéngiriye 101, kirodiye 40, bosniye we gértségowina 17, sérbiye 27, albaniye 53»

shimaliy atlantik ehdi teshkilati — nato, shiwétsiye we finlandiye qatarliq 20 din artuq nato ittipaqdishi we shérikining 1400 din artuq jiddiy ishlargha taqabil turush xadimlirining türkiyege orunlashturulghanliqini élan qildi.

rusiye 147, moldawiye 55, polsha 76, qazaqistan 68, giruziye 60, kuweyt 45, tunis 41 kishidin terkib tapqan qutquzush etretlirining türkiyege ewetilgenlikini uqturdi؛ ukraina 87 kishilik qutquzush etrtining türkiyege qarap yolgha chiqqanliqini bildürdi.

xitay izdesh - qutquzush we saqliqni saqlash xadimliridin terkib tapqan 82 kishilik bir guruppa bilen döletning izdesh-qutquzush teshkilati — Ramunion ning sekkiz xadimi we alahide terbiyelengen bir apsharkisining türkiyege qarap yolgha chiqqanliqini bildürdi.

iran 10, yaponiye 18, malaysiya 75, hindistan we pakistan 50, teywen 44, koréye texminen 110 kishilik qutquzush etriti ewetishni pilanlawatqanliqini uqturdi.

shimaliy qibris türk jumhuriyiti yer tewreshning zerbisige uchrighan sheherlerge 200 kishilik qutquzush etriti ewetilgenlikini élan qildi.

israiliyening ikki yardem ayropilanining biri, 167 kishilik asasliq izdesh – qutquzush xadimini élip adanagha yétip keldi. liwan bolsa 72, liwiye 55 xadim ewetti.

mezkur döletlerdin kelgen yaki yolgha chiqqan xadimlarning yénida köp sanda izdesh we qutquzush apsharkiliri wezipe öteydu.

bu jeryanda, iran yer tewreshning tesirige uchrighan rayonlargha chédir, yémeklik oralmisi qatarliq yardem buyumlar qachilanghan bir yardem ayropilanini ewetti.

italiye xelq mudapiesi we déngiz-okyan siyasetliri ministiri néllo musuméchi, bir dala doxturxanisi bésilghan déngiz armiyesi paraxotining türkiyege ewetilidighanliqini bildürdi.

wénézuélamu dora we yémeklik oralmiliri bilen birlikte 50 kishilik izdesh we qutquzush etritini türkiye we süriyege ewetidighanliqini uqturdi.

ereb birleshme xelipiliki yer tewreshning tesirige uchrighan rayonlarni 50 milyon dollar yardem meblighi bilen teminleshni qarar qildi. kanada türkiye we süriyediki yer tewreshning zerbisige uchrighanlargha ishlitilishi üchün 10 milyon dollar ewetidighanliqini bildürdi.

awistiraliye bash ministiri antoniy albanis, dölitining mutexessisler guruppisi ewetip, türkiyediki izdesh we qutquzush xizmetlirini qollaydighanliqini bildürdi.

qirghizistan ewetken 67 xadimmu qahramanmarashqa yétip keldi.

mongghuliyening bir yardem ayropilani 35 kishilik izdesh – qutquzush etriti we sehiye xadimi bilen insanperwerlik yardem buyumlirini élip türkiyege keldi.

yardem eshyaliri bésilghan ikki ayropilanini türkiye bilen süriyege ewetkenlikini bildürgen pakistan , téximu köp yardem ewetidighanliqini élan qildi.

omanmu türkiye bilen süriyege hawa yardimi karidori qurup, insanperwerlik yardimi we dawalash eshyalirini ewetishni bashlighanliqini uqturdi.

qatar ete ötküzülidighan qatar longqisini talishish yérim hel qilghuch musabiqining bélet kirimini yer tewreshning tesirige uchrighanlargha yardem qilish üchün türkiye bilen süriyege ewetidighanliqini bildürdi.