herqaysi döletlerning rehberliri türkiyege teziye bildürmekte

türkiye awazi radiyosi xewiri: qirghizistan pirézidénti sadir japparow jumhur reis erdoghangha téléfon qilip, yer tewresh apitide jénidin ayrilghanlargha teziye bildürdi we yarilanghanlargha shipaliq tilidi.

japparow bundaq musheqqetlik mezgilde qirghizistanning qérindash dölet türkiyeni qollaydighanliqini, qoshumche insanperwerlik yardem teriqiside imkaniyetning bariche her türlük yardemlerde bolushqa teyyar ikenlikini tekitlidi.

aljiriye pirézidénti abdulmejid tebbunmu, jumhur reis erdoghangha téléfon qilip, yer tewresh apitide jénidin ayrilghanlargha teziye bildürdi we yarilanghanlargha shipaliq tilidi.

tebbun aljiriyening yer tewresh apitide hemishe türkiye xelqi bilen bille ikenlikini eskertti, hemde dölitining türkiye bilen toluq hemkarliq asasida heriket qilish we her türlük yardemlerde bolushqa teyyar ikenlikini qeyt qildi.

türkiye jumhur reislik mehkimisi uchur - alaqe ishliri idarisining bildürüshiche, gérmaniye bash ministiri olaf sholz, engliye bash weziri rishi sunak, gollandiye bash ministiri mark rutté we erméniye bash ministiri nikol pashinyan qatarliqlarmu yer tewresh apiti tüpeyli jumhur reis rejep tayyip erdoghangha téléfon qilip, jénidin ayrilghanlar üchün teziye bildürgen, yarilanghanlargha shipaliq tiligen.

engiliye padishahi charlézmu teziye bayanati élan qilip, özining we repiqisining türkiyede yüz bergen yer tewresh xewerliridin chongqur qayghurghanliqini bayan qildi.

charléz bayanatida mundaq dédi: «yer tewresh apitide yéqin – yoruqliridin ayrilip qalghanlarning aile-tawabiatliridin semimiy hal soraymen. bu dehshetlik tebiiy apette talapetke uchrighanlar we izdesh - qutquzush paaliyetlirige yardem bériwatqanlargha dua qiliwatimiz.»

afriqa ellirimu yer tewresh apiti tüpeyli türkiyege teziye bildürmekte we her türlük yardemlerde bolushqa teyyar ikenliklirini jakarlimaqta.

sudan igilik hoquq kéngishining reisi we quruqluq armiyesining qomandani général abdulfettah elburhan, chad pirézidénti muhemmed idris debi itno, uganda pirézidénti yowéri museweni, kongo jumhuriyiti pirézidénti dénis sasso niguésso,  jenubiy sudan diplomatiye  we xelqara hemkarliq ministiri mayik eyyi déng, chad tashqi ishlar ministiri mehmud eli yüsüp we mawritaniye tashqi ishlar ministirliqimu teziye bayanatlirini élan qilip, türkiyediki yer tewreshte jénidin ayrilghanlargha teziye bildürdi, yarilanghanlargha shipaliq tilidi.