dunya elliri türkiyege qutquzush etretliri we yardem buyumlirini ewetishni dawamlashturmaqta

türkiye awazi radiyosi xewiri: ezerbeyjan jiddiy ehwallar ministirliqi bayanat élan qilip, pirézidént ilham eliyéwning yolyoruqigha asasen, insanperwerlik yardem eshyaliri bésilghan ikki ayropilanning qisqa waqit ichide türkiyege qarap yolgha chiqidighanliqi élan qildi؛ bayanatta, ayropilanlarning birige toluq eslihelik bir sehra doxturxanisining qachilanghanliqi qeyt qilindi.

ezerbeyjan izdesh we qutquzush xizmitige qatnishish üchün türkiyege 420 xadim ewetkenidi.

shimaliy qibris türk jumhuriyitidiki herbiy qisimliri, herqaysi ammiwi organlar we puqralar teminligen dora, yémeklik, issitquch, ediyal, kiyim-kéchek, chédir we bashqa buyumlar élip mangghan ikki paraxot türkiyege qarap yolgha chiqti.

özbékistan pirézidéntliq mehkimisi bayanat élan qilip, shewket mirziyayéwning yolyoruqigha asasen, özbékistan jiddiy ehwallar ministirliqidin 100 kishilik qutquzush etritining yer tewreshte yarilanghanlargha yardem bérish xizmetlirige ishtirak qilish üchün, alahide üsküniler we insanperwerlik yardem eshyalirini élip, tashkent ayrodurumidin türkiyege qarap yolgha chiqqanliqini uqturdi.

türkmenistan yer tewreshning zerbisiige uchrighan rayonlargha insanperwerlik yardem buyumliri we qutquzush etriti ewetti.

qazaqistanning türkiyediki yer tewreshning zerbisige uchrighan rayonlardiki qutquzush xizmetlirige ishtirak qilidighan 41 kishilik izdesh – qutquzush etriti bilen her xil üskünilerni élip yolgha chiqqan ayropilani ghaziantep ayrodurumigha qondi.

bélarusiye yer tewreshtin kéyin xarabilik astida qalghanlarni qutquzush xizmetlirige qatnishish üchün türkiyege izdesh izdesh — qutquzush etriti ewetidighanliqini uqturdi.

giruziye xarabilik astida qapsilip qalghanlarni qutquzush üchün izdesh we qutquzush etriti türkiyege ewetti.

amérika tashqi ishlar bayanatchisi néd prays, 79 kishilik amérika izdesh we qutquzush etritining aldimizdiki künlerde türkiyege yétip baridighanliqini, buningdin bashqa, washingtonning türkiye bilen süriyeni insanperwerlik yardem meblighi bilen teminleydighanliqini élan qildi.

türkiyening washingtondiki elchixanisimu yer tewreshning zerbisige uchrighanlargha yardem bérish seperwerlik paaliyiti yolgha qoydi.

amérikadiki ammiwi teshkilatlar bilen herqaysi idare – organlar yer tewreshni chöridigen halda yardem toplash xizmetlirini élip barmaqta؛ nyu-yorktiki türk öyide toplanghan yardem matériyallirimu apet rayonigha yetküzüp bérilidu.

rusiye jiddiy ehwallar ministiri aléksandr kurénkof rusiyening türkiyening yer tewreshning zerbisige uchrighan rayonlirigha izdesh-qutquzush guruppiliri, sehiye mutexessisliri we sehra doxturxanisi  ewetkenlikini uqturdi.

firansiye 136 kishilik 2 izdesh-qutquzush etritining türkiyediki apet rayonigha qarp yolgha chiqqanliqini élan qildi.

gérmaniyening kölindin shehiridin 41 xadim, yette apsharkidin teshkillengen bir guruppa izdesh we qutquzush xizmitige qatnishish üchün yolgha chiqti.

yaponiyening 18 kishilik xelqara jiddiy qutquzush etriti istanbulgha yétip keldi.

xitay qutquzush xizmetlirige yardem bérish üchün, qahramanmarashqa xelq qutquzush etriti ewetti.

méksika pirézidénti andrés manuél lopéz obradorning buyruqigha asasen 145 kishilik izdesh-qutquzush etritini türkiyege ewetti.

wéngiriye hökümiti türkiyediki xelqara insanperwerlik yardem herikitini qollash üchün apet rayonigha 55 kishilik qutquzush etriti yollidi.

bash ministir shahbaz sherifning buyruqigha asasen, pakistan türkiyege izdesh we qutquzush etretlirini ewetti.

salwador pirézidénti nayb buklé yer tewreshtin kéyin, türkiyege izdesh-qutquzush etriti ewetidighanliqini élan qildi.

yer tewreshtin kéyin, shimaliy makédoniye 40 kishilik izdesh-qutquzush etriti türkiyege ewetishni qarar qildi.

pelestin bash ministiri muhemmed ishtiyye süriye we türkiyediki qutquzush xizmetlirige hemdem bolush üchün xelq mudapiesi we dawalash etriti ewetilidighanliqini uqturdi.

ottura sherqtiki 12 si ereb döliti bolup jemiy 14 dölet, türkiyege izdesh, qutquzush we insanperwerlik yardem etriti ewetidighanliqini jakarlidi.

jenubiy koréye pirézidénti yon suk yéolmu türkiyege derhal izdesh – qutquzush etriti yollash toghrisida yolyoruq chüshürdi.

hindistandin 50 din artuq izdesh – qutquzush xadimi we yardem buyumlirini élip yolgha chiqqan herbiy yük ayropilanining birinchisi adanagha qondi.

qatar yer tewreshning éghir zerbisige uchrighan türkiye bilen süriyege 10 ming seyyare öy ewetidighanliqini uqturdi.

moldawiye pirézidénti maya sandu ijtimaiy taratqudiki adrésida uchur hembehrilep, moldawiye ichki ishlar ministirliqi qarmiqidiki jiddiy ehwallargha taqabil turush bash teptish idarisining 55 xadim, 12 aptomobildin terkip tapqan qutquzush etritini türkiyege ewetkenlikini yazdi.