jumhur reis erdoghan bash ministir kurti bilen qoshma muxbirlarni kütüwélish yighini ötküzdi

türkiye awazi radiyosi xewiri: jumhur reis erdoghan xizmet ziyariti munasiwiti  bilen türkiyege kelgen kosowo bash ministiri albin kurti bilen tünügün istanbuldiki wahdettin sariyida körüshkendin kéyin, qoshma muxbirlarni kütüwélish yighini ötküzdi.

erdoghan aldinqi hepte kosowoning shimalida yüz bergen kelkün apiti üchün qayghurghanliqini ipadilep, kosowoluqlardin hal sorighandin kéyin, türkiye we türk xelqining her daim kosowoluq qérindashlirining yénida ikenlikini, buningdin kéyinmu ularning yénida turushni dawamlashturidighanliqini éytti.

türkiyening amérikadin kéyinla kosowoni étirap qilghan ikkinchi dölet ikenlikige shiaret qilip ötken erdoghan, kosowoning xelqara sehnidiki tégishlik ornigha érishishige kapaletlik qilish üchün küch chiqirishni dawamlashturuwatqanliqlirini bildürdi.

u, türkiyening, kosowoning barliq qoshniliri bilen bolghan tinch munasiwetlerni ilgiri sürüshige intayin ehmiyet béridighanliqini tekitlep: «bu arqa körünüshte, biz kosowo bilen sérbiye otturisidiki diyalogni qollaymiz, tereplerning tinch we berpachi pozitsiye namayan qilishini ümid qilimiz. sérbiye bilen bolghan söhbet musapisining rayonning uzun muddetlik tinchliq we muqimliqigha kapaletlik qilidighan shekilde yekünlinishini arzu qilimiz. türkiye rayonimizning tinchliqi we muqimliqi üchün zörür bolghan her qandaq yardemni qilishqa, terepler xalighan teqdirde tégishlik töhpe qoshushqa teyyar» dédi.

kosowo bash ministiri kurti, shimaliy atlantik ehdi teshkilati — natoning 1999-yilidiki mudaxilisining kosowo xelqige qaritilghan irqiy qirghinchiliqni toxtatqanliqini tilgha élip, türkiyening bu mesilidiki roligha her waqit minnetdar ikenlikini, buningdin bashqa türkiyening kosowoning yawropa ittipaqi we natogha eza bolush tirishchanliqini izchil qollap kelgenlikini, shu wejidin jumhur reis erdoghangha rehmet éytidighanliqini qeyt qildi.