erdoghan ijtimaiy taratqularda eng köp egeshküchisi bolghan rehberler qataridin orun aldi
italiyede dijital sanliq melumatlarni tehlil qilidighan bir fondi jemiyetning tetqiqatigha asaslanghanda, dölitimiz jumhur reisi rejep tayyip erdoghan ijtimaiy taratqularda eng köp egeshküchisi bolghan rehberler qataridin orun alghan.
türkiye awazi radiyosi xewiri: italiye dijital fondi jemiyitining «dijital közitish» doklatini menbe qilghan italiye «ANSA» agébntliqining xewer qilishiche, féysbuk, instagram we twittérni asas qilghan tetqiqatta, 24 dölet yaki hökümet bashliqlirining ijtimaiy alaqe hésabliri tehlil qilinghan. ijtimaiy taratqularda eng köp teqip qilinghan dunya rehberliri, amérika pirézidénti jo baydin, jumhur reis erdoghan we ukraina pirézidénti wiladimir zélénskiy bolghan.
dijital közitish fondining mesulliridin sandro giorgétti bergen bayanatida: «rehberler eng köp ishlitidighan üch ijtimaiy alaqe supisini nezerde tutqanda, baydinning 66 milyondin artuq egeshküchisi bilen aldinqi orunda turghanliqini, erdoghanning 40 milyondin artuq egeshküchisi bilen ikkinchi we zélénskiyning 27 milyondin artuq egeshküchisi bilen üchünchi orunda turghanliqini körimiz. emma zélénskiy dunya jamaetchilikining ukrainadiki urushqa bolghan qiziqishi sewebidin bashqa ikki rehberge sélishturghanda téximu köp xelqaraliq egeshküchilerge ige» dégen.
sandro giorgétti erdoghan bilen zélénskiyning sadiq egeshküchilirining barliqini we ular élan qilghan her bir yazmining ayrim mestanilerni shekillendürgenlikini bildürüp, biraziliye pirézidénti luyiz inakiyo lula da silwaningmu ijtimaiy taratqularda eng aktip dölet bashliqlirining biri ikenlikini tilgha alghan.
sandro giorgéttining bildürishiche bularning arqidin ret boyiche misir pirézidénti abdul fattah es sisi, engiliye bash ministiri rishi sunak we italiye bash ministiri giorgiya méloni eng köp egeshküchisi bolghan rehberler iken.
