چاۋۇشئوغلۇ باش كاتىپ تاھا بىلەن قۇرئان كەرىمگە قىلىنىۋاتقان ھۇجۇملار توغرىسىدا سۆزلەشتى

تۈركىيە ئاۋازى رادىيوسى خەۋىرى: دۆلىتىمىز (تۈركىيە جۇمھۇرىيىتى) تاشقى ئىشلار مىنىستىرى مەۋلۈت چاۋۇشئوغلۇ، ئىسلام ھەمكارلىق تەشكىلاتى باياناتچىسى ھۈسەيىن ئىبراھىم تاھا بىلەن قۇرئان كەرىمگە قىلىنىۋاتقان ھۇجۇملاردا توغرىسىدا تېلېفون سۆھبىتى ئۆتكۈزدى.

مىنىستىر مەۋلۈت چاۋۇشئوغلۇ بىلەن باش كاتىپ ھۈسەيىن ئىبراھىم تاھا، قۇرئان كەرىمگە قىلىنىۋاتقان ھۇجۇملار  ۋە بۇ ھۇجۇملارغا ئىسلام دۇنياسىنىڭ بىلدۈرىدىغان نارازىلىقى توغرىسىدا سۆزلەشتى.

يەنە بىر تەرەپتىن، تۈركىيە جۇمھۇرىيىتى جۇمھۇر رەئىسلىك مەھكىمىسى باياناتچىسى ئىبراھىم قالىنمۇ ئىجتىمائىي تاراتقۇدىكى ئادرېسىدا بايانات ئېلان قىلىپ، پىكىر ئەركىنلىكىنى مۇقەددەس قىممەتلەرگە ھۇجۇم قىلىش ئۈچۈن سۈيىئېستىمال قىلىشنىڭ توغرا ئەمەسلىكىگە ئىشارەت قىلغان ھالدا: «ياۋروپا ئىسلامغا قارشى ھۇجۇملارنىڭ ئالدىنى ئېلىش تەدبىرلىرىنى يولغا قويۇشى كېرەك» دېدى.

تۈركىيە دىيانەت ئىشلىرى باشقارمىسى باشلىقى ئەلى ئەرباش، مۇقەددەس قىممەتلەرگە ھۇجۇم قىلىشنى ئەركىنلىك تونى ئاستىدا نورماللاشتۇرۇشقا بولمايدىغانلىقىنى تەكىتلەپ، قۇرئان كەرىمنىڭ ئاللاھنىڭ پۈتكۈل ئىنسانىيەتكە نازىل قىلغان ئەڭ ئاخىرقى ئىلاھىي كىتابى ئىكەنلىكىنى بىلدۈردى.

دانىيەنىڭ ئاشقۇن ئوڭچىل «قاتتىق يۆنىلىش» پارتىيەسى رەھبىرى راسمۇس پالۇدان  21 - يانۋار تۈركىيەنىڭ ستوكھولمدىكى ئەلچىخانىسى ئالدىدا قۇرئاننى كۆيدۈرگەن، ساقچىلارنىڭ ھىمايىسىدە سادىر قىلىنغان ۋەقە جەريانىدا نامايىشچىلارنىڭ پالۇدانغا يېقىنلىشىشىغا يول قويۇلمىغانىدى.

گوللاندىيەدىمۇ ئىرقچى ئېقىمدىكى «غەربنىڭ ئىسلاملىشىشىغا قارشى ۋەتەنپەرۋەر ياۋروپالىقلار» ھەرىكىتى رەھبىرى ئېدۋىن ۋاگېنسۋېلد 23-يانۋار لاھەيدە قۇرئان كەرىمنى يىرتقانىدى.

ھەر ئىككى ھۇجۇمغا تۈركىيە ۋە ئىسلام دۇنياسى كۈچلۈك شەكىلدە نارازىلىق بىلدۈرگەنىدى.

بۈگۈن تۈركىيە، دانىيەنىڭ قۇرئان كەرىمگە ھاقارەت قىلىشنى ئۆز ئىچىگە ئالغان بىر پائالىيەتكە رۇخسەت قىلىشىغا نارازىلىق بىلدۈرۈپ،  دانىيەنىڭ ئەنقەرەدە تۇرۇشلۇق باش ئەلچىسى داننىي ئانناننى تاشقى ئىشلار مىنىستىرلىقىغا چاقىرتقانىدى.

تۈركىيە جۇمھۇرىيىتى تاشقى ئىشلار مىنىستىرلىقىنىڭ دانىيەدە قۇرئان كەرىمگە ھۇجۇم قىلىشنى ئۆز ئىچىگە ئالغان بىر پائالىيەتكە رۇخسەت قىلىنغانلىقىدىن خەۋەر تاپقاندىن كېيىن، دانىيەنىڭ ئەنقەرەدە تۇرۇشلۇق باش ئەلچىسىنىڭ مىنىستىرلىققا چاقىرتىلغانلىقى بىلدۈرۈلگەن باياناتىدا: «باش ئەلچىگە ئوچۇق – ئاشكارا ئۆچمەنلىك جىنايىتى ماھىيىتىدىكى بۇ ئىغۋاگەرچىلىك ھەرىكىتىگە رۇخسەت قىلىنىشىنى ئەڭ كۈچلۈك شەكىلدە ئەيىبلەيدىغانلىقىمىز ۋە دانىيەنىڭ بۇ پوزىتسىيەنى قوبۇل قىلىشنىڭ مۇمكىن ئەمەسلىكى يەتكۈزۈلدى. بۇ ھەرىكەتكە يول قويماسلىقىنى ئۈمىد قىلىدىغانلىقىمىز تەكىتلەندى» دېگەن ئىبارىلەرگە ئورۇن بېرىلگەنىدى.