تۈركىيە ياكى مۇسۇلمانلارنىڭ ئېتىقادىغا ھۆرمەت قىلمىغانلار ناتو مەسىلىسىدە قوللىشىمىزغا ئېرىشەلمەيدۇ

جۇمھۇر رەئىس رەجەپ تاييىپ ئەردوغان پايتەخت ئەنقەرەدە ئۆتكۈزۈلگەن ئىچكى كابىنېت يىغىنىدىن كېيىن شىۋېتسىيەدىكى قۇرئان كەرىمنى كۆيدۈرۈش قىلمىشى توغرىسىدا توختالدى.

1936890
تۈركىيە ياكى مۇسۇلمانلارنىڭ ئېتىقادىغا ھۆرمەت قىلمىغانلار ناتو مەسىلىسىدە قوللىشىمىزغا ئېرىشەلمەيدۇ

تۈركىيە ئاۋازى رادىيوسى خەۋىرى: جۇمھۇر رەئىس ئەردوغان پايتەخت ئەنقەرەدە ئۆتكۈزۈلگەن ئىچكى كابىنېت يىغىنىدىن كېيىن ئېلان قىلغان باياناتى جەريانىدا، شىۋېتسىيەنىڭ ستوكھولمدىكى تۈركىيە ئەلچىخانىسى ئالدىدا دانىيەنىڭ ئوڭچىل «قاتتىق يۆنىلىش پارتىيەسى» رەھبىرى راسمۇس پالۇداننىڭ قۇرئان كەرىمنى كۆيدۈرۈشىگە رۇخسەت قىلىشىغا قاتتىق نارازىلىق بىلدۈردى.

«ئەگەر سىلەر تۈركىيە جۇمھۇرىيىتىنىڭ ۋەياكى مۇسۇلمانلارنىڭ دىنىي ئېتىقادىغا ھۆرمەت قىلمىساڭلار، شىمالىي ئاتلانتىك ئەھدى تەشكىلاتى — ناتو مەسىلىسىدە بىزنىڭ قوللىشىمىزغىمۇ ئېرىشەلمەيسىلەر» دېگەن ئەردوغان، سۆزىنى داۋاملاشتۇرۇپ: «ئەلچىخانىمىز ئالدىدا بۇنداق نومۇسسىزلارچە قىلمىشنىڭ يۈز بېرىشىگە سەۋەب بولغانلار، ناتوغا ئەزالىق ئىلتىماسى مەسىلىسىدە بىزدىن خەيرخاھلىق قىلىشىمىزنى كۈتمەسلىكى كېرەك» دېگەنلەرنى قەيت قىلدى.

دانىيەنىڭ ئاشقۇن ئوڭچىل «قاتتىق يۆنىلىش» پارتىيەسى رەھبىرى راسمۇس پالۇدان شەنبە كۈنى تۈركىيەنىڭ ستوكھولمدىكى ئەلچىخانىسى ئالدىدا قۇرئاننى كۆيدۈرگەن، ساقچىلارنىڭ ھىمايىسىدە سادىر قىلىنغان ۋەقە جەريانىدا نامايىشچىلارنىڭ پالۇدانغا يېقىنلىشىشىغا يول قويۇلمىغانىدى.

ئىيۇندا ئىسپانىيەدە ئۆتكۈزۈلگەن ناتو باشلىقلار يىغىنى جەريانىدا فىنلاندىيە بىلەن شىۋېتسىيەنىڭ ناتوغا ئەزا بولۇشىغا يېشىل چىراغ يېقىشى ئۈچۈن، تېررورىزمغا قارشى كۈرەش مەسىلىسىدە تۈركىيەنىڭ ئەندىشىلىرىنى بىر تەرەپ قىلىدىغانلىقى توغرىسىدا ئۈچ تەرەپ كېلىشىمى ئىمزالىغانىدى.



مۇناسىۋەتلىك خەۋەرلەر