گوللاندىيەنىڭ ئەنقەرەدە تۇرۇشلۇق باش ئەلچىسى تاشقى ئىشلار مىنىستىرلىقىغا چاقىرتىلدى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى تاشقى ئىشلار مىنىستىرلىقىنىڭ گوللاندىيەدە بىر كىشىنىڭ قۇرئان كەرىمگە ھاقارەت قىلىش قىلمىشى توغرىسىدىكى باياناتىدا مۇنداق دېيىلدى: «گوللاندىيەنىڭ لاھەي شەھىرىدە ئىسلام دۈشمىنى بىر كىشىنىڭ 22-يانۋارمۇقەددەس كىتابىمىز <قۇرئان كەرىم>گە قىلغان قەبىھ ھۇجۇمىنى ئەڭ قاتتىق شەكىلدە ئەيىبلەيمىز.

شىۋېتسىيەدىن كېيىن، بۇ قېتىم گوللاندىيەدە يۈز بەرگەن مۇقەددەس قىممەت قارىشىمىزنى ھاقارەتلەشتىن ئىبارەت بۇ قەبىھ قىلمىش، ئىسلام دۈشمەنلىكى، كەمسىتىش ۋە چەت ئەللىكلەرگە ئۆچمەنلىك قىلىشنىڭ ياۋروپادا چەك - چېگراسىنىڭ يوقلۇقىنىڭ ئېنىق جاكارلىنىشىدۇر.

بۇ قىلمىشلار مۇسۇلمانلارنىڭلا ئەمەس، پۈتكۈل ئىنسانىيەتنىڭ ئاساسىي ھوقۇقى ۋە ئەركىنلىكى، ئەخلاقىي قىممەت قارىشى ۋە ئىجتىمائىي كەڭ قورساقلىقىنى بىۋاسىتە زەربە نىشانى قىلماقتا ھەمدە توپلىشىپ تىنچ ياشاش مەدەنىيىتىگە زىيان يەتكۈزمەكتە.

گوللاندىيەنىڭ ئەنقەرەدە تۇرۇشلۇق باش ئەلچىسىنى مىنىستىرلىقىمىزغا چاقىرىپ، بۇ رەزىل، پەسكەش قىلمىشنى قاتتىق ئەيىبلەيدىغانلىقىمىز، نارازىلىق بىلدۈرىدىغانلىقىمىز كۈچلۈك ئىپادىلەندى، گوللاندىيەدىن بۇ خىل قۇتراتقۇلۇقلارغا يول قويماسلىقى تەلەپ قىلىندى.

بىز گوللاندىيە دائىرىلىرىنىڭ ۋەقەنىڭ جاۋابكارىغا قارىتا زۆرۈر تەدبىر قوللىنىپ، كونكرېت قەدەملەرنى تاشلاپ، بۇ خىل ۋەقەلەرنىڭ قايتا يۈز بېرىشىنىڭ ئالدىنى ئېلىشنى ئۈمىد قىلىمىز.»