chawushoghlu afriqagha téximu köp ashliq ewetish kéreklikini bildürdi

türkiye awazi radiyosi xewiri: tashqi ishlar ministiri chawushoghlu jenubiy afriqa jumhuriyiti xelqara munasiwet we hemkarliq ministiri nalédi pandor bilen prétoriyede ministirliqta ötküzülgen qoshma axbarat élan qilish yighinida söz qildi.

u özlirining pandor bilen ikki tereplik we xelqaraliq mesililer toghrisida keng dairide söhbetleshkenlikini, ul- eslihe we énérgiye türidiki pursetlerge qarap chiqqanliqini bildürüp, alaqidar organlar otturisida ilmiy we téxnologiye hemkarliq kélishimining imzalanghanliqini qeyt qildi.

u özlirining rayon we dunyawi mesililerdimu pikir almashturghanliqlirini eskertip, türkiyening afriqagha tutqan pozitsiyesining barawer shériklik, özara hörmet qilish we teng payda élish istratégiyesi üstige qurulghanliqini bayan qildi.

chawushoghlu ukraina heqqidiki soallargha jawab bergende, türkiyening bu jehette zor küch chiqarghanliqini, jumhur reis rejep tayyip erdoghanning izchil halda urush toxtitish we bashtin-axir tinchliq üchün tirishiwatqanliqini bayan qildi.

u mundaq dédi:

«elwette, bizning nishanimiz uzaq muddetlik tinchliq we özara qobul qilishqa bolidighan mesilini hel qilish charisi. biz bu urushning söhbet üstilide axirlishidighanliqigha ishinimiz. qanche téz bolsa shunche yaxshi» dédi.

u yémek-ichmek bixeterliki we afriqa xelqini qollash mesiliside, bu jehette éghir mesililerning otturigha chiqqanliqini, yémek-ichmek we énérgiye bixeterlikining intayin muhimliqini tekitlidi.

u özlirining rusiye we ukraina bilen bu mesile toghrisida dawamliq söhbetlishiwatqanliqlirini, bu menidin éytqanda, türkiyening afriqagha erkin éksport qilishni emelge ashurush mumkinlikini bayan qildi.

u: «biz türkiye bolush süpitimiz bilen tereqqiy qiliwatqan we tereqqiy qilmighan döletlerge, afriqa chong quruqluqigha téximu köp ashliq we oghut ewetish kérek dep qaraymiz» dédi.

u biraziliyening sabiq prézidénti bolsonaroning qollighuchilirining dölet kongre binasigha bésip kirishi toghrisidiki soalgha jawab bergende, bu ehwalni «heqiqeten qobul qilghili bolmaydighanliqi» ni we «türkiyeni endishege salghanliqi» ni bildürdi.