әрдоған: 1 милйон йумшақ детал мутәхәссисини ишқа орунлаштуруш санини 2 һәссә көпәйттуқ
җумһур рәис рәҗәп таййип әрдоған 1 милйон йумшақ детал мутәхәссисини ишқа орунлаштуруш лайиһәсидики тәрбийәләнгүчиләр санини келәр йили икки һәссә көпәйткәнликлирини билдүрди.
түркийә авази радийоси хәвири: җумһур рәис рәҗәп таййип әрдоған бәштәпә хәлқ қурултийи вә мәдәнийәт мәркизидә өткүзүлгән «1 милйон йумтал мутәхәссисини ишқа орунлаштуруш лайиһәси» ни тонуштуруш йиғинида қилған сөзидә, технологийәниң тәрәққийатиниң пәқәт түркийәдила әмәс, пүткүл дунйадиму лайақәтлик әмгәк күчлиригә кәң көләмдә пурсәт йаритип бериватқанлиқини, болупму илғар технологийәгә асаслинидиған мәһсулатларни пирограммилиқ һалға кәлтүрүш, һәмдә қошумчә қиммити йуқири йумталларни тәрәққий қилдуруш лайиһәлиридә йахши тәрбийәләнгән көп санда хизмәтчи – хадимларға еһтийаҗ барлиқини әскәртти.
миллий технологийәлик игилик тикләш истратегийәсигә асасән 2030-йилға барғанда 100 миң технологийәлик игилик тикләш пиланини алдинқи айларда елан қилғанлиқлирини әскәрткән әрдоған, өзлири қоллайдиған кәлгүсиниң кәспи түрини 25 тин 100 гә көпәйткәнликлирини, тәлим - тәрбийә пирограммилириниң муддитини болса 6 айдин 9 айға узартқанлиқлирини қәйт қилди.
у 2020-йили йолға қойулған 1 милйон йумтал мутәхәссисини ишқа орунлаштуруш лайиһәси даирисидә, һәқсиз вә һечқандақ шәрти болмиған лайиһәгә тизимлатқанларниң 33 кәсптин бирини таллап, системидики 1800 саәтлик 216 қетимлиқ тәрбийәләшкә қатнишалайдиғанлиқлирини тәкитләп мундақ деди: «башланғучидин тартип таки һазирғичә нишандин һалқип, 1 милйон 96 миң 566 киши бу пирограмма арқилиқ оқушни тамамлиди. қизиқидиғанлар наһайити көп болғанлиқи үчүн, 1 милйон йумтал мутәхәссисини ишқа орунлаштуруш лайиһәмизни давамлаштуруш, системидики тәрбийәләнгүчиләр санини келәр йили икки һәссә көпәйтишни қарарлаштурдуқ.»
