altun: pütkül dunya türkiyening «muqimlashturghuchi küch» ikenlikini qobul qildi
jumhur reislik mehkmisi uchur - alaqe ishliri idarisining bashliqi fahrettin altun pütkül dunyaning türkiyeni «muqimlashturghuchi küch» ikenlikini qobul qilghanliqini éytti.
türkiye awazi radiyosi xewiri: jumhur reislik mehkmisi uchur - alaqe ishliri idarisining bashliqi fahrettin altun istanbulda chaqirilghan 6 – nöwetlik «‹TRT World› munbiri» yighinida qilghan sözide, türkiyening jumhur reis rejep tayyip erdoghanning rehberlikide rayonluq kirizislar we yer shari xaraktérlik ixtilaplarning hel qilinishigha hesse qoshuwatqanliqini tekitlep mundaq dédi: ««dölitimiz bilen birlikte rayonimizdin bashlap dunyaning herqaysi jaylirigha démokratiye, tereqqiyat, tinchliq we güllinish élip kélishni nishan qiliwatimiz.»
türkiyening nöwette pütkül dunyagha ülge bolidighan özgiche tashqi siyaset endizisini yolgha qoyuwatqanliqini eskertken altun, mundaq dep körsetti: «rayonluq we yer shari xaraktérlik aktiyorgha aylanghan türkiye, nöwette peqet oxshimighan guruppilarni bir gewdileshtüridighan köwrük bolupla qalmay, yene diyalog, söhbet we diplomatiye ötidighan bir yolgha aylandi.»
u türkiyening rusiye – ukraina urushida diplomatiye jehettin nahayiti zor muweppeqiyetlerni qolgha keltürgenlikini eskertip, mundaq dédi: «texminen 10 ay dawamlashqan rusiye-ukraina urushida biz yolgha qoyghan tinchliq diplomatiyesi, pütkül dunyaning türkiyeni <muqimlashturghuchi> we yer sharining tinchliqigha hesse qoshuwatqan <yarashturghuchi> küch süpitide qobul qilghanliqining eng roshen namayendisidur. türkiyening shiwétsiye we finlandiyening shimaliy atlantik ehdi teshkilati-natogha eza bolush iltimasi jeryanidiki tirishchanliqi, yershari xaraktérlik térrorizmgha qarshi küresh namidin muhim wedilerning élinishi we körünerlik netijilerning qolgha keltürülüshide türtkilik rol oynidi.»
u yene, dunyaning qutuplishishining aldini élishning muhimliqini tekitlesh bilen bir waqitta, yéngi soghuq urushlarning aldini élishning zörürlükinimu sözlirige ilawe qildi.
