erdoghan bilen eliyéw eskerlerge xitab qildi

türkiye awazi radiyosi xewiri: dölet mudapie ministiri xulusi aqar, hemrahliqidiki bash ishtab bashliqi yashar güler we türkiye armiyesi qomandanlar heyiti bilen birlikte «qérindash mushti» namliq türkiye – ezerbeyjan birleshme herbiy manéwirining «tallanghan közetküchiler küni» paaliyetlirige qatnashti.

ezerbeyjan dölet mudapie ministiri zakir hesenow bilen ezerbeyjan armiyesi qomandanlirimu qatnashqan herbiy manéwirning axirida, aqar bilen hesenow herbiy xadimlar bilen bir yerge jem boldi.

kéyinche jumhur reis erdoghan, téléfonda körüshken dölet mudapie ministiri xulusi aqarning yanfunidin, ezerbeyjan pirézidénti ilham eliyéw bolsa, ezerbeyjan dölet mudapie ministiri zakir hesenowning yanfunidin birleshme herbiy manéwirgha qatnashqan eskerlerge xitab qildi.

erdoghan, türkiye – ezerbeyjan birleshme herbiy manéwirning muweppeqiyetlik axirlishishi tüpeyli eskerlerni tebriklep mundaq dédi: «bu birleshme herbiy manéwirni <bir millet, ikki dölet> éngigha asasen muweppeqiyetlik halda ötküzdünglar. bu arqiliq yéqin – yoruqliringlar we dostliringlargha küch-quwwet béghishlidinglar, düshmininglarning könglige qorqush saldinglar.»

müshkül yer we hawarayi sharaitida élip bérilghan manéwirning ikki dölet armiyesining téximu qudret tépishigha töhpe qoshidighanliqini eskertken jumhur reis erdoghan, mundaq dep körsetti: «bu manéwir shuni ispatlidiki, biz bir-birimiz bilen xuddi gösh bilen söngekke oxshaymiz. héchkim bizni bir-birimizdin ayriwételmeydu. xudayim buyrisa, buningdin kéyinmu hergiz ayriwételmeydu.»

ezerbeyjan pirézidénti ilham eliyéw mundaq dédi: «birleshme herbiy manéwir muweppeqiyetlik tamamlanghanliqi üchün, ezerbeyjan we türkiye armiyelirini tebrikleymen. bu manéwirning nami <qérindash mushti> dur. bu türkiye-ezerbeyjan birlikining namayendisidur. bizning birlikimiz tewrenmestur, ebediydur. yashisun türkiye-ezerbeyjan qérindashliqi!»