әрдоған билән әлийев әскәрләргә хитаб қилди

дөлитимиз (түркийә җумһурийити) җумһур рәиси рәҗәп таййип әрдоған түркийә билән әзәрбәйҗанниң гөш билән сөңәккә охшайдиғанлиқини ейтти.

1915506
әрдоған билән әлийев әскәрләргә хитаб қилди

түркийә авази радийоси хәвири: дөләт мудапиә министири хулуси ақар, һәмраһлиқидики баш иштаб башлиқи йашар гүләр вә түркийә армийәси қоманданлар һәйити билән бирликтә «қериндаш мушти» намлиқ түркийә – әзәрбәйҗан бирләшмә һәрбий маневириниң «талланған көзәткүчиләр күни» паалийәтлиригә қатнашти.

әзәрбәйҗан дөләт мудапиә министири закир һәсәнов билән әзәрбәйҗан армийәси қоманданлириму қатнашқан һәрбий маневирниң ахирида, ақар билән һәсәнов һәрбий хадимлар билән бир йәргә җәм болди.

кейинчә җумһур рәис әрдоған, телефонда көрүшкән дөләт мудапиә министири хулуси ақарниң йанфунидин, әзәрбәйҗан пирезиденти илһам әлийев болса, әзәрбәйҗан дөләт мудапиә министири закир һәсәновниң йанфунидин бирләшмә һәрбий маневирға қатнашқан әскәрләргә хитаб қилди.

әрдоған, түркийә – әзәрбәйҗан бирләшмә һәрбий маневирниң мувәппәқийәтлик ахирлишиши түпәйли әскәрләрни тәбрикләп мундақ деди: «бу бирләшмә һәрбий маневирни <бир милләт, икки дөләт> еңиға асасән мувәппәқийәтлик һалда өткүздүңлар. бу арқилиқ йеқин – йоруқлириңлар вә достлириңларға күч-қуввәт беғишлидиңлар, дүшминиңларниң көңлигә қорқуш салдиңлар.»

мүшкүл йәр вә һаварайи шараитида елип берилған маневирниң икки дөләт армийәсиниң техиму қудрәт тепишиға төһпә қошидиғанлиқини әскәрткән җумһур рәис әрдоған, мундақ дәп көрсәтти: «бу маневир шуни испатлидики, биз бир-биримиз билән худди гөш билән сөңәккә охшаймиз. һечким бизни бир-биримиздин айриветәлмәйду. худайим буйриса, буниңдин кейинму һәргиз айриветәлмәйду.»

әзәрбәйҗан пирезиденти илһам әлийев мундақ деди: «бирләшмә һәрбий маневир мувәппәқийәтлик тамамланғанлиқи үчүн, әзәрбәйҗан вә түркийә армийәлирини тәбрикләймән. бу маневирниң нами <қериндаш мушти> дур. бу түркийә-әзәрбәйҗан бирликиниң намайәндисидур. бизниң бирликимиз тәврәнмәстур, әбәдийдур. йашисун түркийә-әзәрбәйҗан қериндашлиқи!»



مۇناسىۋەتلىك خەۋەرلەر