chawushoghlu: shiwétsiye bilen finlandiyening nato ezaliqi musapisi ijabiy ilgirilewatidu

türkiye awazi radiyosi xewiri: tashqi ishlar ministiri mewlüt chawushoghlu paytext enqerede dölet ishliri ziyaritide boluwatqan türkmenistan ministirlar kéngishining muawin bashliqi we tashqi ishlar ministiri rashid meredow bilen birlikte ötküzgen axbarat élan qilish yighinidin kéyin, muxbirlarning soallirigha jawab berdi.

u shiwétsiye bilen finlandiyening natogha eza bolushi üchün iyun éyida (2022) ispaniyede imzalanghan üch terep kélishimi üstide toxtilip, mundaq dédi:

«ruméniye paytexti buxaréstta ötküzülidighan nato tashqi ishlar ministirliri yighinida köp sanda ayrim uchrishishlar ktküzülidu. mesilen, gérmaniye tashqi ishlar ministiri annaléna bayérbok we engliye tashqi ishlar weziri jéymés kléwérli bilen körüshimiz. shiwétsiye bilen finlandiyening tashqi ishlar ministirliri bilenmu biryussélda üch terep ramkisida körüshimiz. kélishimning bezi maddiliri orundaldi, bezi maddiliri turuwatidu. mundaqche qilip éytqanda, bezi konkrét qedemler bésilmidi. térroristlarni qayturup bérish we qanungha özgertishke munasiwetlik konkrét telepler orundalmidi. parlamnétimiz we xelqimiz qayil bolushi kérek. jumhur reis rejep tayyip erdoghanmu shiwétsiye bash minisrigha bu heqte teleplirini yetküzdi. yighinchaqlighanda, musape ijabiy ilgirilewatidu, emma yene qilinidighan ishlar bar.»

u axirida, ikki döletning shertlerni orundishi toghrisida toxtilip: «finlandiye terepte mesililer anche éghir emes, shiwétsiye bilen mesililirimiz köpirek. éniq éytqanda, téximu köp ijabiy qedem tashlishi kérek bolghan dölet shiwétsiye» dédi.