erdoghan quruqluq herikitidin bésharet berdi

türkiye awazi radiyosi xewiri:  jumhur reis rejep tayyip erdoghan qatar ziyaritidini axirlashturup qaytish sepiride, ayropilanda küntertipke mumasiwetlik mesililer üstide toxtaldi.

u iraq bilen süriyening shimalida élip bérilghan «penche-qilich hawa herikiti» üstide toxtilip: «her daim déginimdek, <bir kéche ushtumtut basturup barimiz> dégen gepni bikargha démeymiz. mana kütken, pilan qilghan waqit yétip kelgen haman bu qedemlerni bastuq. tünügün kéche emelge ashurulghan herbiy heriket buning toluq ispati» dédi.

u «penche-qilich hawa herikiti» ning hawa herikiti bilenla cheklinip qalmaydighanliqini tekitlep: «mudapie ministirliqimiz we armiye qomandanliq ishtabimiz birlikte qarar qilidu. muzakirelerdin kéyin, shuninggha qarita qedem tashlaymiz» dédi.

u mezkur herbiy heriket toghrisida amérika pirézidénti jo baydin we rusiye pirézidénti wladimir putin bilen körüshmigenlikini eskertip, mundaq dédi:

«emma, bizning mezkur rayonda bu xil herbiy heriketlerni qilalaydighanliqimizni pirézidént baydin we putin bilidu. biz her daim <bir kéche ushtumtut basturup barimiz> dep kéliwatimiz. biz birsidin ijazet almaymiz. bir ishni qilmaqchi bolsaq, qarar qilimiz we shu boyiche qilimiz. buningda amérika bizni bilishi kérek. belkim bilishi mumkin. inshaallah buningdin kéyinki musapide, téximu chong qedemlerni qetiylik bilen qandaq tashlaydighanliqmizni hem tashlishimiz kéreklikini hemmisi köridu.»